ന്യൂദല്ഹി: കൊവിഡ് 19 സ്ഥിരീകരിച്ച ബോളിവുഡ് ഗായിക കനിക കപൂറിന്റെ പുതിയ പരിശോധനാഫലം നെഗറ്റീവെന്ന് വിവരം. അഞ്ചാമത്തെ തവണ നടത്തിയ പരിശോധനയിലാണ് ഇതാദ്യമായി കനികയുടെ റിസല്ട്ട് നെഗറ്റീവ് ആയത്. ലഖ്നൌവിലുള്ള സഞ്ജയ് ഗാന്ധി പോസ്റ്റ് ഗ്രാജ്വേറ്റ് ഇന്സ്റ്റിറ്റ്യൂട്ട് ഓഫ് മെഡിക്കല് സയന്സസിലെ ചികിത്സയിലാണ് അവര്. അടുത്ത ടെസ്റ്റില് കൂടി ഫലം നെഗറ്റീവ് ആകുന്നപക്ഷം കനികയ്ക്ക് ആശുപത്രി വിടാം.
മാര്ച്ച് 20 നാണ് ലണ്ടനില് നിന്ന് മടങ്ങിയെത്തിയ കനിക കപൂറിന് കൊവിഡ് 19 സ്ഥിരീകരിച്ചത്. ലണ്ടനില് നിന്ന് തിരികെയെത്തിയ കനിക യാത്രാവിവരം മറച്ചുവെച്ച് വിമാനത്താവളത്തിലെ പരിശോധനയില് നിന്ന് ഒഴിവാകുകയും ചെയ്തിരുന്നു. തുടര്ന്ന് സുഹൃത്തുക്കള്ക്കും കുടുംബാംഗങ്ങള്ക്കുമായി ലഖ്നൌവിലെ പഞ്ചനക്ഷത്ര ഹോട്ടലില് ഇവര് ഒരു പാര്ട്ടിയും സംഘടിപ്പിച്ചിരുന്നു. ബിജെപി നേതാവ് വസുന്ധര രാജ സിന്ധ്യയും മകന് ദുഷ്യന്ത് സിംഗും അടക്കമുള്ള രാഷ്ട്രീയ നേതാക്കളും ചില ബോളിവുഡ് താരങ്ങളും ഈ പാര്ട്ടിയില് പങ്കെടുത്തിരുന്നു.
