പാലക്കാട്‌ : പ്ലാച്ചിമട സമര നായികയായ വിജയനഗര്‍ കോളനിയിലെ കന്നിയമ്മ അന്തരിച്ചു. പാലക്കാട്ടെ വസതിയില്‍ വച്ചായിരുന്നു അന്ത്യം. പ്ലാച്ചിമട സമരത്തിന്റെ പ്രതീകമായിത്തീര്‍ന്ന മയിലമ്മയുടെ മരണശേഷം പ്ലാച്ചിമടസമരത്തിന്റെ മുന്നണിയിലുണ്ടായിരുന്നത് കന്നിയമ്മയായിരുന്നു. പ്ലാച്ചിമട നഷ്ടപരിഹാര ട്രൈബ്യൂണല്‍ ബില്ലിന് അനുമതി ആവശ്യപ്പെട്ട് ഡല്‍ഹിയില്‍ നടത്തിയ പാര്‍ലമെന്റ് മാര്‍ച്ചിലും കന്നിയമ്മ മുന്നണിപ്പോരാളിയായിരുന്നു.
പ്ലാച്ചിമട സമരസമിതി സംസ്ഥാനതലത്തില്‍ നടത്തിയ ജലാധികാരയാത്രയിലും മറ്റു പ്രക്ഷോഭങ്ങളിലുമെല്ലാം സജീവ സാന്നിധ്യമായിരുന്നു. മുത്തുലക്ഷ്മി, സരസ, പാര്‍വതി, മയിലാത്ത, പാപ്പാമ്മാള്‍ തുടങ്ങി ഒട്ടേറെ ആദിവാസിസ്ത്രീകള്‍ പ്ലാച്ചിമട സമരത്തിന്റെ മുന്‍നിരയിലുണ്ടായിരുന്നു. പന്തലൊരുക്കാനും ധര്‍ണയ്ക്ക് ഇരിക്കാനും പ്ലാച്ചിമട സമരത്തിന്റെ പ്രാധാന്യം ലോകത്തിനുമുന്നില്‍ എത്തിക്കാനും ഇവര്‍ വഹിച്ച ത്യാഗത്തിന് കണക്കില്ല. അവരില്‍ മയിലമ്മയും കന്നിയമ്മയുമാണ് സമരത്തെ നെഞ്ചിലേറ്റിയ സമരനായികമാരായത്.
എഴുത്തും വായനയും അറിയാത്ത കന്നിയമ്മയാണ് സമരനാളുകളില്‍ കൊക്കകോള വിരുദ്ധസമരത്തെക്കുറിച്ച്‌ ആഞ്ഞടിച്ചത്. സമരപ്പന്തല്‍ അടിച്ചുവൃത്തിയാക്കാനും പ്രവര്‍ത്തകര്‍ക്ക് ഭക്ഷണമുണ്ടാക്കാനും തുടങ്ങി ഏതാവശ്യത്തിനും ഓടിനടക്കുന്ന കന്നിയമ്മയ്ക്ക് സമരപ്പന്തല്‍തന്നെയായിരുന്നു വീട്. പരിസ്ഥിതിപ്രവര്‍ത്തകരെയും മാധ്യമപ്രവര്‍ത്തകരെയും പ്ലാച്ചിമടയിലും സമീപകോളനികളിലുമുള്ള ജനങ്ങളുടെ ദുരിതം കാണിക്കാന്‍ കൊണ്ടുപോകുന്നതും കന്നിയമ്മയായിരുന്നു.
