കണ്ണൂര്: കണ്ണൂര് ട്രെയിന് തീവെപ്പ് കേസിലെ അന്വേഷണവുമായി ബന്ധപ്പെട്ട് പോലീസ് സംഘം കൊല്ക്കത്തയില്. കണ്ണൂര് സിറ്റി ഇന്സ്പെക്ടര് ബിജു പ്രകാശിന്റെ നേതൃത്വത്തിലുള്ള സംഘമാണ് കൊല്ക്കത്തയിലെത്തിയത്. കേസുമായി ബന്ധപ്പെട്ട് പോലീസ് കസ്റ്റഡിയിലുള്ള ബംഗാള് സ്വദേശിയെ കുറിച്ച് അന്വേഷിക്കാനാണ് കേരളത്തില് നിന്നുള്ള പോലീസ് സംഘം കൊല്ക്കത്തയിലെത്തിയത്. കസ്റ്റഡിയിലുള്ള ബംഗാള് സ്വദേശിയുടെ അറസ്റ്റ് ഉടനുണ്ടായേക്കും.
ഭിക്ഷ എടുക്കാന് സമ്മതിക്കാത്തതിലുള്ള വിരോധം കാരണമാണ് തീ വെച്ചതെന്നാണ് കസ്റ്റഡിയിലെടുത്ത ബംഗാള് സ്വദേശിയുടെ മൊഴി. സുരക്ഷ ഉദ്യോഗസ്ഥരോടുള്ള വിരോധമാണ് പ്രകോപനം ഉണ്ടാക്കിയതെന്നും പ്രതി വെളിപ്പെടുത്തിയതായാണ് പോലീസില് നിന്നും ലഭിച്ച വിവരം. കസ്റ്റഡിയിലുള്ളയാള് തീവെപ്പിന് തൊട്ട് മുന്പ് ട്രാക്കിന് പരിസരത്ത് ഉണ്ടായിരുന്നതായി സിസിടിവി ദൃശ്യങ്ങളില് നിന്ന് വ്യക്തമായിരുന്നു.
