കണ്ണൂര് : ജില്ലാ ട്രഷറിയിലെ സാമ്പത്തിക തട്ടിപ്പുമായി ബന്ധപ്പെട്ട് സീനിയര് അക്കൗണ്ടന്റ് പിടിയില്. കൊറ്റാളി സ്വദേശി നിധിന്രാജ് ചെല്ലട്ടനാണ് പിടിയിലായത്. കഴിഞ്ഞ ദിവസം ജില്ലാ ട്രഷറിയില് വിജിലന്സ് പരിശോധന നടത്തിയിരുന്നു. ഇതിന് പിന്നാലെയാണ് നിധിന്രാജിനെ പിടികൂടിയത്. 6 ഇടപാടുകളിലായി മൂന്നരലക്ഷം രൂപ ഇയാള് തട്ടിയെടുത്തതായാണ് വിജിലന്സ് കണ്ടെത്തിയിരിക്കുന്നത്.
നേരത്തെ ഒരു സാമ്പത്തിക ക്രമക്കേട് കണ്ടെത്തിയതിനെ തുടര്ന്ന് സീനിയര് അക്കൗണ്ടന്റിനെ സസ്പെന്ഡ് ചെയ്തിരുന്നു. കൂടുതല് അന്വേഷണത്തിന്റെ ഭാഗമായാണ് വെള്ളിയാഴ്ച വിജിലന്സ് പരിശോധന നടത്തിയത്. ഈ പരിശോധനയില് കൂടുതല് സാമ്പത്തിക തിരിമറി നടത്തിയതായി കണ്ടെത്തുകയായിരുന്നു. സര്ക്കാര് ബില്ലുകള് അടക്കം വെട്ടിച്ചതായാണ് കണ്ടെത്തല്. 2016 മുതലാണ് തട്ടിപ്പ് നടത്തിയിരുന്നത്. സര്ക്കാര് പദ്ധതികളില് ഗുണഭോക്താക്കള്ക്ക് ലഭിക്കേണ്ട പണം, കര്ഷക തൊഴിലാളി ആനുകൂല്യം, എച്ച്ഡിസി ആനുകൂല്യം, കൈത്തറി മൃഗ സംരക്ഷണ ദുരിതാശ്വാസം, തുടങ്ങിയവ സ്വന്തം അക്കൗണ്ടുകളിലേക്ക് മാറ്റി തിരിമറി നടത്തിയെന്നാണ് വിജിലന്സ് കണ്ടെത്തിയത്.
