കൊച്ചി : ഫസല് വധക്കേസില് പ്രതികളായ സിപിഎം നേതാക്കള്ക്കെതിരെ അന്വേഷണം നടത്തിയതിന് ഇടതു സര്ക്കാര് പെന്ഷനും ആനുകൂല്യങ്ങളും നിഷേധിച്ച മുന് ഐപിഎസ് ഉദ്യോഗസ്ഥന് കെ.രാധാകൃഷ്ണന് വാഹനാപകടത്തില് പരുക്ക്. സിപിഎം സര്ക്കാരിന്റെ വേട്ടയാടല് വാര്ത്തകള് പുറത്തു വന്നതിനു പിന്നാലെയാണ് അപകടം ഇന്നലെ തൃപ്പൂണിത്തുറയിലെ ഇദ്ദേഹത്തിന്റെ വീടിനു മുന്നില് റോഡ് മുറിച്ചു കടക്കുമ്പോള് ഓട്ടോറിക്ഷയെ ഓവര്ടേക്ക് ചെയ്തു വന്ന സ്കൂട്ടര് ഇടിച്ചായിരുന്നു അപകടം.
നടുവിനും തലയ്ക്കും പരുക്കേറ്റ് രാധാകൃഷ്ണന് കൊച്ചിയിലെ സ്വകാര്യ ആശുപത്രിയില് ചികിത്സയിലാണ്. സംഭവത്തില് ദുരൂഹതയില്ലെന്നാണ് പോലീസ് പ്രാഥമിക അന്വേഷണത്തില് കണ്ടെത്തിയിട്ടുള്ളത്. തൃപ്പൂണിത്തുറ പോലീസ് കേസെടുത്തിട്ടുണ്ട്. സ്ഥാനക്കയറ്റത്തിലൂടെ ഐപിഎസ് നേടി ആറുമാസം മുന്പു വിരമിച്ച രാധാകൃഷ്ണന് ബെംഗളുരുവില് സെക്യൂരിറ്റി ജോലി ചെയ്തു വരികയായിരുന്നു. ഇതിനിടെ കഴിഞ്ഞ ദിവസമാണ് എറണാകുളത്തെ വീട്ടിലെത്തിയത്.
തന്റെ പെന്ഷനും ആനുകൂല്യങ്ങളും തടഞ്ഞു വച്ചതിനെതിരെ മുഖ്യമന്ത്രിയെ കണ്ടു പരിഭവം പറഞ്ഞപ്പോള് അദ്ദേഹമത് പരിഗണിക്കാതെ തള്ളിക്കളഞ്ഞെന്നാണ് രാധാകൃഷ്ണന്റെ വെളിപ്പെടുത്തല്. താന് ആത്മഹത്യയുടെ വക്കിലാണ് എന്നു പറഞ്ഞപ്പോള് അതാണ് നല്ലതെന്നു പറഞ്ഞ് അധിക്ഷേപിച്ചുവിട്ടെന്നും അദ്ദേഹം ഒരു പ്രമുഖ മാധ്യമങ്ങളോട് പറഞ്ഞിരുന്നു. ഇതു സംബന്ധിച്ച വാര്ത്തകള് പുറത്തു വന്നതോടെ സിപിഎം പ്രവര്ത്തകരില് നിന്ന് തനിക്കു നേരെ ആക്രമണമുണ്ടാകുമോ എന്നു ഭയമുണ്ടെന്നും അദ്ദേഹം വെളിപ്പെടുത്തിയിരുന്നു.
