ദുബായ് : രാജ്യത്തെ വിദ്യാഭ്യാസ വിനിമയത്തിനും ജീവകാരുണ്യ പ്രവര്ത്തനങ്ങള്ക്കും മികച്ച സംഭാവന നല്കിയതിനും യു.എ.ഇയുടെ ആദരമേറ്റുവാങ്ങി കാന്തപുരം എ.പി അബൂബക്കര് മുസലിയാര്. യുഎഇയുമായി ജാമിഅ: മര്കസിനുളള അന്താരാഷ്ട്ര ബന്ധത്തിനും കൂടിയാണ് ജാമിഅ: മര്കസ് ചാന്സിലറും ഇന്ത്യന് ഗ്രാന്റ് മുഫ്തിയുമായ കാന്തപുരം എ.പി അബൂബക്കര് മുസലിയാര്ക്ക് ഗോള്ഡന് വിസ നല്കി യു.എ.ഇ ആദരിച്ചത്.
ഇന്ത്യയില് നിന്ന് ആദ്യ ഹ്യൂമാനിറ്റേറിയന് ഗോള്ഡന് വിസ ലഭിക്കുന്നയാളായി ഇതോടെ കാന്തപുരം. വിവിധ മേഖലകളില് കഴിവ് തെളിയിച്ചവര്ക്ക് യു.എ.ഇ ഭരണകൂടം നല്കുന്നതാണ് പത്ത് വര്ഷത്തെ ഗോള്ഡന് വിസ. ദുബായ് താമസ കുടിയേറ്റ വകുപ്പ് ആസ്ഥാനത്ത് നടന്ന ചടങ്ങില് ഗോള്ഡന് വിസ കാന്തപുരം ഏറ്റുവാങ്ങി.
തനിക്ക് നല്കിയ അംഗീകാരത്തിന് യുഎഇ പ്രസിഡന്റ് ഷെയ്ഖ് ഖലീഫ ബിന് സായിദ് അല് നഹ്യാന്, യുഎഇ വൈസ് പ്രസിഡന്റ് ദുബായ് ഭരണാധികാരി ഷെയ്ഖ് മുഹമ്മദ് ബിന് റാഷിദ് അല് മക്തൂം, അബുദാബി കിരീടാവകാശി ഷെയ്ഖ് മുഹമ്മദ് ബിന് സായിദ് അല് നഹ്യാന് എന്നിവര്ക്ക് കാന്തപുരം നന്ദി അറിയിച്ചു.
