തിരുവനന്തപുരം : ലോട്ടറിയുടെ ഒരേ നമ്പരിലുള്ള രണ്ടു ടിക്കറ്റുകള് വിപണിയില് എത്തുന്നില്ലെന്ന് ഉറപ്പിക്കാന് ഇനി മുന്കരുതല് ശ്ക്തമാക്കും. കാരുണ്യ ലോട്ടറിയുടെ ഒരേ നമ്പരിലുള്ള രണ്ട് ടിക്കറ്റുകള് വിപണിയിലെത്തിയതു സംബന്ധിച്ച് ടിക്കറ്റ് അച്ചടിച്ച കെ.ബി.പി.എസിനോട് വിശദീകരണം തേടുമെന്ന് ലോട്ടറി ഡയറക്ടര് എബ്രഹാം റെന് അറിയിച്ചു. അച്ചടിയില് വന്ന പിഴവുമൂലമാണ് ഇങ്ങനെ സംഭവിച്ചതെന്ന് ബോധ്യപ്പെട്ടിട്ടുണ്ട്. അത്യപൂര്വമായാണ് ഇങ്ങനെ സംഭവിക്കാറുള്ളതെങ്കിലും ഇതു ഗൗരവമായി കാണും.
തികച്ചും വിശ്വസ്തവും സുതാര്യവുമായാണ് അച്ചടി മുതലുള്ള എല്ലാ പ്രവര്ത്തനങ്ങളും വകുപ്പ് നിര്വഹിക്കുന്നത്. അച്ചടിപ്പിഴവു മൂലം ഒരേ നമ്പരില് ഒന്നിലധികം ടിക്കറ്റുകള് വിപണിയിലെത്തുകയും ഈ നമ്പരിന് സമ്മാനം ലഭിക്കുകയും ചെയ്യുന്ന സാഹചര്യമുണ്ടായാല് സമ്മാനാര്ഹര്ക്ക് വകുപ്പ് സമ്മാനത്തുക നല്കും. അച്ചടിസ്ഥാപനത്തില്നിന്ന് ഈ തുക ഈടാക്കാന് ഇതുസംബന്ധിച്ച കരാറില് വ്യവസ്ഥയുണ്ടെന്നും ലോട്ടറി ഡയറക്ടര് വ്യക്തമാക്കി.
