ആലപ്പുഴ : വേമ്പനാട്ട് കായലിലും ഇടത്തോടുകളിലും ജലനിരപ്പ് താഴ്ന്നതിനാല്‍ ജലഗതാഗത വകുപ്പിന്റെ ബോട്ട് സര്‍വീസുകളെ ബാധിക്കുന്നു. മുമ്പ് പോള തിങ്ങിക്കിടന്നിരുന്നതാണ് ബോട്ട് സര്‍വീസിന് തടസം സൃഷ്ടിച്ചിരുന്നതെങ്കില്‍, ഇപ്പോള്‍ ചൂട് കാരണം കായലിലെ വെള്ളത്തിന്റെ അളവ് കുറഞ്ഞതോടൊപ്പം പോള ചീയുന്നതും തിരച്ചടിയായി. ചീഞ്ഞ പോള അടിത്തട്ടിലേക്ക് പോകാതെ ജലോപരിതലത്തില്‍ കിടക്കും. കുട്ടനാടന്‍ പ്രദേശങ്ങളില്‍ അഴുകിയ പോളയോടൊപ്പം പ്ലാസ്റ്റിക് മാലിന്യവും തിങ്ങി നിറഞ്ഞ് ബോട്ടിന്റെ പ്രൊപ്പല്ലറില്‍ കുടുങ്ങുന്നുണ്ട്. ഹൗസ് ബോട്ട് സര്‍വീസിനെയും ഇത് ബാധിക്കുന്നുണ്ട്.
വെള്ളക്കുറവ് കാരണം ബോട്ടിന്റെ വേഗത കുറച്ചാണ് ഇപ്പോള്‍ സഞ്ചാരം. ജലഗതാഗത വകുപ്പിന്റെ ബോട്ട് സര്‍വീസ് നടക്കുന്ന മുഹമ്മ, പെരുമ്പളം, തുടങ്ങിയ ഫെറികളിലും ജലപാതകളിലും ജലഗതാഗതം ദുഷ്‌കരമാണ്. പോളയ്ക്ക് പുറമേ കനത്തതോതില്‍ വളര്‍ന്ന പുല്ലുകൂട്ടങ്ങള്‍ ചീഞ്ഞതും കാരണം വെള്ളത്തിന് കടുത്തദുര്‍ഗന്ധമാണ്. ഈ വെള്ളം തുണികഴുകാന്‍ പോലും ഉപയോഗിക്കാന്‍ കഴിയാത്ത അവസ്ഥയാണെന്നാണ് പ്രദേശവാസികള്‍ പറയുന്നു. എ.സി റോഡിന്റെ നവീകരണം നടക്കുന്നതിനാല്‍ കുട്ടനാട്ടിലെ ഉള്‍പ്രദേശങ്ങളിലുള്ളവര്‍ ജലഗതാഗത വകുപ്പിന്റെ ബോട്ട് സര്‍വീസിനെയാണ് കൂടുതലായി ആശ്രയിക്കുന്നത്.
