മല്ലപ്പള്ളി : കല്ലൂപ്പാറയില് റോഡില്ക്കൂടി നടന്നുപോയ സ്ത്രീയുടെ കഴുത്തിൽ നിന്നും സ്വർണ്ണമാല അപഹരിച്ച് ബൈക്കിൽ രക്ഷപെട്ട പ്രതികളെ കീഴ്വായ്പൂർ പോലീസ് പിടികൂടി. ആലപ്പുഴ തെക്കേക്കര സ്വദേശി ചൂരല്ലൂർ ശാന്ത ഭവനത്തിൽ മിഥുൻ (25), ആലപ്പുഴ ഭരണിക്കാവ് സ്വദേശി മുട്ടത്തേട്ട് കിഴക്കേതിൽ കമൽ (20) എന്നിവരാണ് പിടിയിലായത്. ഫെബ്രുവരി 5 ന് ആയിരുന്നു കേസിന് ആസ്പദമായ സംഭവം. എറണാകുളം കുറുപ്പംപടിയിൽ നിന്നും മോഷ്ടിച്ച ബൈക്കിൽ കല്ലുപ്പാറയിലെത്തിയ പ്രതികൾ മകളോടൊപ്പം നടന്നു പോവുകയായിരുന്ന വെച്ചൂച്ചിറ സ്വദേശിനി അഞ്ജുവിന്റെ കഴുത്തിൽ നിന്ന് സ്വർണ്ണമാല പിടിച്ചുപറിച്ച് രക്ഷപെടുകയായിരുന്നു.
കേസ് രജിസ്റ്റർ ചെയ്ത് പ്രദേശത്തെ സി.സി.ടിവി ദൃശ്യങ്ങൾ പരിശോധിച്ച കീഴ്വായ്പ്പൂർ പോലീസ് തുടർച്ചയായ അന്വേഷണത്തിനൊടുവിൽ കുറുപ്പംപടി പോലീസിന്റെ കൂടി സഹായത്തോടെ പ്രതികളെ അറസ്റ്റ് ചെയ്യുകയായിരുന്നു. ഇരുവരും ആലപ്പുഴ എറണാകുളം ജില്ലകളിലെ വിവിധ സ്റ്റേഷനുകളിലെ കേസുകളിൽ പ്രതികളാണ്. ബൈക്ക് മോഷണ കേസിൽ കുറുപ്പംപടി പോലീസ് മിഥുന്റെ അറസ്റ്റ് രേഖപ്പെടുത്തി. കീഴ്വായ്പൂർ സ്റ്റേഷനിൽ എത്തിച്ച കമലിനെ കോടതിയിൽ ഹാജരാക്കി റിമാൻഡ് ചെയ്തു.
