തിരുവനന്തപുരം : പുതിയ കേരള നിയമസഭയുടെ ആദ്യ സമ്മേളനം വിളിച്ചുചേർക്കാൻ ഗവർണറോട് ശുപാർശ ചെയ്യാൻ തീരുമാനിച്ചു. ഇതനുസരിച്ച് മെയ് 21-ന് പുതിയ എംഎൽഎമാരുടെ സത്യപ്രതിജ്ഞ നടക്കും. നിയമസഭയിലെ ഏറ്റവും മുതിർന്ന അംഗങ്ങളിൽ ഒരാളും അമ്പലപ്പുഴ എംഎൽഎയുമായ മുൻമന്ത്രി ജി. സുധാകരനെ പ്രോ-ടേം സ്പീക്കറായി നിയമിക്കാൻ തീരുമാനിച്ചിട്ടുണ്ട്. മെയ് 21-ന് എംഎൽഎമാരുടെ സത്യപ്രതിജ്ഞയും മെയ് 22-ന് സ്പീക്കർ തിരഞ്ഞെടുപ്പും നടക്കും. ഗവർണറുടെ അംഗീകാരം ലഭിക്കുന്നതനുസരിച്ച് മെയ് 29-ന് ഗവർണറുടെ നയപ്രഖ്യാപന പ്രസംഗം ഉണ്ടായിരിക്കും.
നിലവിലെ അഡ്വക്കേറ്റ് ജനറൽ കെ. ഗോപാലകൃഷ്ണ കുറുപ്പിന്റെ രാജി സ്വീകരിച്ചു. ഹൈക്കോടതിയിലെ മുതിർന്ന അഭിഭാഷകനായ ജയജു ബാബുവിനെ പുതിയ അഡ്വക്കേറ്റ് ജനറലായി നിയമിക്കാൻ തീരുമാനിച്ചു. ടി.എ. ഷാജിയുടെ രാജി സ്വീകരിച്ചതിനെത്തുടർന്ന് അഡ്വക്കേറ്റ് ടി. അസഫലിയെ ഡയറക്ടർ ജനറൽ ഓഫ് പ്രോസിക്യൂഷനായി നിയമിക്കും. നേരത്തെ ഉമ്മൻചാണ്ടി സർക്കാരിന്റെ കാലത്തും അദ്ദേഹം ഈ പദവി വഹിച്ചിട്ടുണ്ട്.
