പത്തനംതിട്ട : സംസ്ഥാനത്ത് ഇന്നലെ രാത്രിയും ഇന്ന് പുലര്ച്ചയുമായി ചെറിയതോതില് മേഘവിസ്ഫോടനം നടന്നു. ഇതേ തുടര്ന്ന് അതിശക്തമായ കാറ്റിലും മഴയിലും വന് നാശനഷ്ടം. എറണാകുളം, ഇടുക്കി, പത്തനംതിട്ട ജില്ലകളിലാണ് കൂടുതല് നാശനഷ്ടം ഉണ്ടായിരിക്കുന്നത്. പത്തനംതിട്ട ജില്ലയിലെ അയിരൂര്, എഴുമറ്റൂര് പഞ്ചായത്തുകളിലാണ് വന് നാശനഷ്ടം ഉണ്ടായത്.
നൂറിലധികം വീടുകള്ക്ക് കേടുപാടുകള് സംഭവിച്ചു. അന്പതിലധികം വൈദ്യുതി പോസ്റ്റുകള് തകര്ന്നു. അയിരൂര്, എഴുമറ്റൂര് പഞ്ചായത്തുകളില് നൂറിലധികം വീടുകള്ക്ക് കേടുപാടുണ്ടായി. പലയിടത്തും ഗതാഗതം പുനസ്ഥാപിക്കാനുള്ള ശ്രമം തുടരുകയാണ്.
കോട്ടയം രാമപുരം മേതിരിയിലും നാശനഷ്ടങ്ങള് റിപ്പോര്ട്ട് ചെയ്തു. ആറ് വീടുകള്ക്ക് മുകളില് മരം കടപുഴകി വീണതായി വിവരമുണ്ട്. പുലര്ച്ചെ അഞ്ചരയോടെയായിരുന്നു കനത്ത കാറ്റ് വീശിയത്. വൈദ്യുതി ബന്ധവും പലയിടത്തും തകരാറിലായി.
ഇടുക്കി ജില്ലയില് മരങ്ങള് കടപുഴകി പലയിടത്തും ഗതാഗതം തടസപ്പെട്ടു. വ്യാപക കൃഷിനാശവുമുണ്ട്. തൊടുപുഴ പടിഞ്ഞാറെ കോടിക്കുളത്ത് വീടുകള്ക്ക് മുകളില് മരം ഒടിഞ്ഞുവീണു. അളപായമില്ല. മരം റോഡിലേക്ക് വീണ് ഗതാഗതം തടസപ്പെട്ട സംഭവവും റിപ്പോര്ട്ട് ചെയ്തിട്ടുണ്ട്. കേരളത്തിന്റെ വടക്കന് മേഖലയിലും കനത്ത മഴ തുടരുകയാണ്.
