തിരുവനന്തപുരം: സംസ്ഥാനത്ത് ഇനി സര്ക്കാര് അപേക്ഷകളില് മാപ്പ്, ക്ഷമ എന്നിവ ഉപയോഗിക്കേണ്ടെന്ന് ഉത്തരവ്. അപേക്ഷകള് സമര്പ്പിക്കുന്നതില് കാലതാമസം ഉണ്ടായാല് അതിന് മാപ്പും ക്ഷമയും പറയേണ്ട. പകരം, കാലതാമസം പരിഗണിക്കാതെ അപേക്ഷയില് തീരുമാനമെടുക്കണമെന്ന് ഉപയോഗിക്കാം. സര്ക്കാര് സേവനങ്ങള്ക്കായുള്ള അപേക്ഷകള് സമര്പ്പിക്കാന് കാലതാമസം നേരിട്ടാല് ഇത് മറികടക്കാനുള്ള അപേക്ഷയില് മാപ്പ്/ക്ഷമ ചോദിക്കാറുണ്ട്. അപേക്ഷ സമര്പ്പിക്കുന്നതിലുണ്ടായ കാലതാമസം ‘ക്ഷമിക്കുക’, ‘ഒഴിവാക്കുക’ എന്നതിലുപരിയായി ഗുരുതരമായ കുറ്റമോ, വലിയ അപരാധമോ എന്ന അര്ത്ഥമാണ് സമൂഹത്തില് ഉണ്ടാക്കുന്നത് എന്ന് ശ്രദ്ധയില് പെട്ടതിനെ തുടര്ന്നാണ് നടപടി.
ഇതിനാല് ‘കാലതാമസം മാപ്പാക്കുന്നതിന്’ എന്നതിനു പകരം ‘കാലതാമസം പരിഗണിക്കാതെ അപേക്ഷയില് തീരുമാനമെടുക്കുന്നതിന്’ എന്ന് ഉപയോഗിക്കേണ്ടതാണ്. മാപ്പ്, മാപ്പപേക്ഷ, മാപ്പാക്കണം തുടങ്ങിയ വാക്കുകള് അപേക്ഷാ ഫോമുകളില് നിന്ന് നീക്കം ചെയ്യണമെന്നും ഇക്കാര്യം എല്ലാ വകുപ്പ് മേധാവികളും ഉറപ്പു വരുത്തണമെന്നും ഉത്തരവില് പറയുന്നു.