തിരുവനന്തപുരം : തിങ്കളാഴ്ച വോട്ടെണ്ണാനിരിക്കെ കേരളം ആർക്കൊപ്പമെന്ന സൂചന നൽകുന്ന എക്സിറ്റ് പോൾ ഫലങ്ങൾ ഇന്ന് പുറത്തുവരും. ഇന്ന് വൈകിട്ട് 6:30 മുതൽ വിവിധ ന്യൂസ് ഏജൻസികളുടെ എക്സിറ്റ് പോൾ ഫലങ്ങൾ പുറത്തുവരുമെന്നാണ് റിപ്പോർട്ട്. നേരിയ ഭൂരിപക്ഷത്തിലായാലും കേരളത്തിൽ ഭരണത്തുടർച്ച ഉണ്ടാകുമെന്ന ഉറപ്പിലാണ് എൽ ഡി എഫ്. മുഖ്യമന്ത്രി പിണറായി വിജയൻ മന്ത്രിമാരോടും ഉദ്യോഗസ്ഥരോടും ഈ ആത്മവിശ്വാസം പ്രകടിപ്പിച്ചിട്ടുണ്ട്. അതേസമയം ഭരണമാറ്റം ഉണ്ടാകുമെന്നതിൽ യു ഡി എഫ് ഉറച്ച് നിൽക്കുകയാണ്. 85-ൽ അധികം സീറ്റുകൾ നേടി തങ്ങൾക്ക് ഭരണം ലഭിക്കുമെന്നാണ് പ്രതിപക്ഷ നേതാക്കൾ ഉൾപ്പെടെ ഉള്ളവർ അവകാശപ്പെടുന്നത്. അതേസമയം ഒന്നിലധികം സീറ്റുകൾ നേടാൻ കഴിയുമെന്ന പ്രതീക്ഷയിലാണ് ബി ജെ പി.
വി എം ആർ, ജൻകി ബാത്ത് മാട്രിസ്, സി വോട്ടർ, തുടങ്ങി അഞ്ചിലധികം ഏജൻസികളുടെ ഫലങ്ങളാണ് ഇന്ന് പുറത്ത് വരാൻ സാധ്യതയുള്ളത്. ആക്സിസ് മൈ ഇന്ത്യ കേരളത്തിലെ ഫലം ഇന്ന് പുറത്ത് വിടുമെന്ന് അറിയിച്ചിട്ടുണ്ടെങ്കിലും ടുഡെയ്സ് ചാണക്യ അടുത്ത ദിവസം മാത്രമേ തങ്ങളുടെ ഫലങ്ങൾ പ്രസിദ്ധീകരിക്കൂ എന്ന് വ്യക്തമാക്കിയിട്ടുണ്ട്. മാർച്ച് 15-നാണു തെരഞ്ഞെടുപ്പ് കമ്മീഷൻ കേരളം ഉൾപ്പെടെയുള്ള സംസ്ഥാനങ്ങളിൽ നിയമസഭാ തെരഞ്ഞെടുപ്പ് പ്രഖ്യാപിച്ചത്. ഏപ്രിൽ 9-നായിരുന്നു കേരളത്തിൽ വോട്ടെടുപ്പ് നടന്നത്. കേരളത്തോടൊപ്പം തമിഴ്നാട്, അസം, പുതുച്ചേരി എന്നീ സംസ്ഥാനങ്ങളിലെ എക്സിറ്റ് പോൾ ഫലങ്ങളും ഇന്നറിയാം.
