തിരുവനന്തപുരം : കോണ്ഗ്രസില് നിന്നും രാജിവെച്ച ലതിക സുഭാഷ് ഇന്ന് എന്.സി.പിയില് ചേരും. ഔദ്യോഗിക പ്രഖ്യാപനം രാവിലെ പതിനൊന്നരയ്ക്ക് വിളിച്ച വാർത്ത സമ്മേളനത്തിലൂടെയാകുമെന്നാണ് സൂചന. എൻസിപിയിൽ ലതിക സുഭാഷിന് മികച്ച സ്ഥാനം ലഭിക്കുമെന്നാണ് കരുതുന്നത്.
താന് എൻസിപിയിലേക്കാണെന്ന സൂചന ദിവസങ്ങൾക്ക് മുമ്പാണ് ലതികാ സുഭാഷ് ആദ്യമായി നൽകിയത്. വരും ദിവസങ്ങളിൽ ഓദ്യോഗിക പ്രഖ്യാപനം ഉണ്ടാവുമെന്നും അറിയിച്ചിരുന്നു. കോട്ടയം ജില്ലയിലെ പാർട്ടിയുടെ പ്രധാന ചുമതല ലതികാ സുഭാഷിന് നല്കുവാനാണ് സാധ്യത.
സീറ്റ് നിഷേധിച്ചതിനെ തുടർന്ന് തലമുണ്ഡനം ചെയ്തുളള അസാധാരണ പ്രതിഷേധത്തിലൂടെ കോൺഗ്രസ് വിട്ട ലതികാ സുഭാഷ് ഏറ്റുമാനൂരിൽ സ്വാതന്ത്രയായി മത്സരിച്ചിരുന്നു. യുഡിഎഫ് സ്ഥാനാർത്ഥിയുടെ തോൽവിയിലും നിർണായക പങ്ക് വഹിച്ചു. തെരഞ്ഞെടുപ്പിന് ശേഷവും സ്വാതന്ത്രയായി തന്നെ നിൽക്കുമെന്ന് പ്രഖ്യാപിച്ചെങ്കിലും എന്.സി.പി സംസ്ഥാന അധ്യക്ഷൻ പി.സി ചാക്കോയുമായി നടത്തിയ ചർച്ചയ്ക്ക് പിന്നാലെയാണ് ഒരു പാർട്ടിയുടെ തണലിലേക്ക് മാറാൻ ലതികാ സുഭാഷ് തീരുമാനിച്ചത്. കോൺഗ്രസിൽ അതൃപ്തരായ പരമാവധി നേതാക്കളെ പാർട്ടിയിലേക്ക് കൊണ്ടുവരാനുളള എൻസിപിയുടെ ശ്രമത്തിന്റെ തുടക്കമായാണ് ലതികാ സുഭാഷിന്റെ എൻസിപി പ്രവേശനത്തെ രാഷ്ടീയ കേരളം കാണുന്നത്.
