തിരുവനന്തപുരം : മൂന്ന് ദിവസം മാറ്റമില്ലാതെ തുടർന്ന സ്വർണവിലയിൽ ഇടിവ്. ഇന്നലെ 4510 രൂപയായിരുന്നു ഒരു ഗ്രാം സ്വർണവില. ഇന്നത്തെ സ്വർണ വില 4500 രൂപയായാണ് ഗ്രാമിന് കുറഞ്ഞത്. അടിയന്തിര ഘട്ടങ്ങളിൽ സ്വർണം എളുപ്പത്തിൽ പണമാക്കി മാറ്റാനും ക്രയവിക്രയം ചെയ്യാനാകുമെന്നതാണ് മലയാളികളുടെ പ്രിയപ്പെട്ട നിക്ഷേപമായി സ്വർണം മാറാനുള്ള പ്രധാന കാരണം. ഇക്കാലങ്ങൾക്കിടെയുണ്ടായ വിലക്കയറ്റത്തോട് സാധാരണക്കാർ പൊരുതിയത് പ്രധാനമായും സ്വർണ വിലയെ ആയുധമാക്കിയാണ്.
അതിനാൽ തന്നെ ഓരോ ദിവസത്തെയും സ്വർണവില കൂടുന്നതും കുറയുന്നതും ഉയർന്ന പ്രാധാന്യത്തോടെയാണ് ജനം കാണുന്നത്. ഇന്നത്തെ സ്വർണ വില മൂന്ന് ദിവസം മുൻപത്തെ സ്വർണ വിലയെ അപേക്ഷിച്ച് കൂടുതലാണ്. ഒരു ഗ്രാം 22 കാരറ്റ് സ്വർണവില 4470 രൂപയായിരുന്നു നവംബർ അഞ്ചിന്. 40 രൂപയുടെ വർധനവാണ് നവംബർ ആറിന് സ്വർണവിലയിൽ ഉണ്ടായത്. മൂന്ന് ദിവസം മാറ്റമില്ലാതെ തുടർന്ന ശേഷമാണ് ഇന്ന് വിലയിടിഞ്ഞത്.
