കാസര്കോട് : സീറ്റ് വിഭജന തര്ക്കം കാരണം ജില്ലയിലെ യു.ഡി.എഫുമായി നിസ്സഹകരിക്കുവാന് തീരുമാനമെടുത്തിരുന്ന കേരള കോണ്ഗ്രസ്, മുതിര്ന്ന നേതാക്കളുടെ ഇടപെടലിനെ തുടര്ന്ന് മുന് തീരുമാനം മാറ്റി.
കഴിഞ്ഞ ദിവസം ജില്ലയിലെത്തിയ മുന് മുഖ്യമന്ത്രി ഉമ്മന് ചാണ്ടിയുടെ നിര്ദേശം മാനിച്ചും പ്രതിപക്ഷ നേതാവ് രമേശ് ചെന്നിത്തല, കേരള കോണ്ഗ്രസ് ചെയര്മാന് പി.ജെ. ജോസഫ് എന്നിവരുടെ കര്ശന നിലപാടിനെ തുടര്ന്നുമാണ് തീരുമാനം.
ജില്ല പഞ്ചായത്ത് ചിറ്റാരിക്കല് ഡിവിഷന് സ്ഥാനാര്ഥിത്വത്തില്നിന്ന് ജെയിംസ് മാരൂര് പിന്വാങ്ങും. ഈസ്റ്റ് എളേരി പഞ്ചായത്തിലെ എട്ട്, 10 വാര്ഡുകളിലെ സ്ഥാനാര്ഥികളെയും പിന്വലിക്കാന് തീരുമാനമായി. പനത്തടി, ബളാല് പഞ്ചായത്തുകളില് സൗഹൃദ മത്സരം നടത്താനും തീരുമാനിച്ചു. മുന് എം.എല്.എ കെ.പി. കുഞ്ഞിക്കണ്ണന്, യു.ഡി.എഫ് ജില്ല കണ്വീനര് എ. ഗോവിന്ദന് നായര്, കേരള കോണ്ഗ്രസ് ജില്ല പ്രസിഡന്റ് ജെറ്റോ ജോസഫ്, എം. ജയിംസ് എന്നിവര് പങ്കെടുത്ത ചര്ച്ചയിലാണ് തീരുമാനമെടുത്തത്.
