റാന്നി: 14-ാം പഞ്ചവത്സര പദ്ധതിയുടെ മുന്നോടിയായി റാന്നി ബ്ലോക്കിലെ വിവിധ ഗ്രാമ പഞ്ചായത്തുകളിലെ വികസന സ്റ്റാൻഡിംഗ് കമ്മിറ്റി വർക്കിംഗ് ഗ്രൂപ്പ് അംഗങ്ങള്ക്കായി കില ഏക ദിന പരിശീലനം നടത്തി. റാന്നി, അങ്ങാടി, പഴവങ്ങാടി, വെച്ചൂച്ചിറ നാറാണംമൂഴി പഞ്ചായത്തുകളിലെ കൃഷി, മൃഗസംരക്ഷണം, പൊതുമരാമത്ത്, പ്രാദേശിക സാമ്പത്തിക ആസൂത്രണം, ദുരന്ത നിവാരണം എന്നീ വർക്കിംഗ് ഗ്രൂപ്പ് ഭാരവാഹികൾക്കായിരുന്നു പരിശീലനം. പഴവങ്ങാടി ഗ്രാമപഞ്ചായത്ത് പ്രസിഡൻ്റ് അനിതാ അനിൽ കുമാർ ഉദ്ഘാടനം നിർവഹിച്ചു. നാറാണംമൂഴി പഞ്ചായത്ത് പ്രസിഡന്റ് ബീനാ ജോബി അദ്ധ്യക്ഷത വഹിച്ചു.
അങ്ങാടി പഞ്ചായത്ത് പ്രസിഡൻ്റ് ബിന്ദു റെജി, ജില്ലാ പ്ലാനിംഗ് ഓഫീസർ സാബു. സി. മാത്യു, കില ഫാക്കൽറ്റി അംഗം എൻ.പ്രകാശ്, ബ്ലോക്ക് കോർഡിനേറ്റർ വി.കെ.രാജഗോപാൽ എന്നിവർ പ്രസംഗിച്ചു. കില ഫാക്കൽറ്റി അംഗങ്ങളായ എൻ.പ്രകാശ്, അബ്ദുൾ ഷുക്കൂർ, പി.എൻ മധുസൂദനൻ, കെ.വി നാരായണൻ, ഡോ.എച്ച്.സജീവ്, പി.എൻ.നൂർജഹാൻ, വി.വിജയകുമാരൻ, ജോൺ ശമുവേൽ, എം.ജെ.കുര്യൻ, പ്രൊഫ.പി.കെ.മോഹൻരാജ്, സ്മിതാ എസ് നായർ, എൻ.ബാലകൃഷ്ണപിളള എന്നിവർ ക്ലാസെടുത്തു. വടശേരിക്കര, ചിറ്റാർ, സീതത്തോട്, പെരുനാട് പഞ്ചായത്തുകളിലെ വികസന സ്റ്റാൻഡിംഗ് കമ്മിറ്റി അംഗങ്ങൾക്കുള്ള പരിശീലനം മെയ് 6 വെള്ളിയാഴ്ച വടശേരിക്കര പഞ്ചായത്ത് ഹാളിൽ നടക്കും.