ചാരുംമൂട് : നൂറനാട് കെഐപി ഉപകനാല് കവിഞ്ഞൊഴുകിയതിനെ തുടര്ന്നു വ്യാപാര സ്ഥാപനത്തിലും വീടുകളിലും വെള്ളംകയറി. ഉപകനാലിനു തൊട്ടടുത്ത പലചരക്കു കടയില് വെള്ളം കയറി അഞ്ച് ലക്ഷത്തോളം രൂപയുടെ നഷ്ടമുണ്ടായി. കെഐപി കനാലിന്റെ നൂറനാട് ജംക്ഷനോടു ചേര്ന്നുള്ള ഷട്ടര് ഭാഗത്തുനിന്നു പളളിക്കല്, ആനയടി ഭാഗങ്ങളിലേക്ക് കടന്നു പോകുന്ന ഉപകനാലാണ് ഇന്നലെ പുലര്ച്ചെ മൂന്ന് മണിയോടെ കവിഞ്ഞൊഴുകിയത്. മുതുകാട്ടുകര മണിമംഗലത്ത് സജീവന്റെ പലചരക്ക് കടയിലാണു വെള്ളം കയറിയത്.
പരിസരവാസികളും വിവരം അറിഞ്ഞെത്തിയ കടയിലെ ജീവനക്കാരും ചേര്ന്നാണ് ഭക്ഷ്യവസ്തുക്കള് അടക്കം പുറത്തേക്ക് മാറ്റിയത്. വെള്ളംകയറി ചാക്കുകണക്കിനു കാലിത്തീറ്റ, പിണ്ണാക്ക്, അരി, ഉപ്പ്, ഗോതമ്പ് തുടങ്ങിയവയാണ് നശിച്ചത്. കഴിഞ്ഞ നാല് വര്ഷത്തിനുള്ളില് ആറാം തവണയാണ് കടയ്ക്കുള്ളിലേക്ക് വെള്ളം കയറുന്നത്. തിങ്കളാഴ്ച രാത്രി മെയിന് കനാലിന്റെ കിഴക്കന് മേഖലകളിലെ ചില ഉപകനാലുകള് അറിയിപ്പ് നല്കാതെ അടച്ചതാണ് വെള്ളം കയറാന് കാരണമെന്നും കെഐപി അധികൃതര് അറിയിച്ചു.
