കോഴിക്കോട്: കൈവേലിയില് മര്ദ്ദനമേറ്റ് പരിക്കേറ്റ നിലയില് കാണപ്പെട്ട യുവാവിന്റെ നില ഗുരുതരമായി തുടരുന്നു. യുവാവിനെ മര്ദ്ദിച്ചയാള്ക്കായി കൂറ്റ്യാടി പോലീസ് തിരച്ചില് ശക്തമാക്കി. വളയം ചുഴലിയിലെ നീലാണ്ടുമ്മല് പാറയുള്ള പറമ്പത്ത് വിഷ്ണുവിനാണ് ക്രൂരമായി മര്ദ്ദനമേറ്റത്. മെഡിക്കല് കോളേജില് ചികിത്സയിലാണ് യുവാവ്. വിഷ്ണുവിനെ കഴിഞ്ഞ ദിവസം രാത്രി കൈവേലി ചമ്പിലോറയിലെ റോഡരികില് അബോധാവസ്ഥയില് കണ്ടത്. വിഷ്ണുവിന്റെ വീട്ടില് നിന്ന് 20 കിലോമീറ്റര് അകലെയാണിത്. വിഷ്ണുവിനെ മര്ദ്ദിച്ച ശേഷം മുപ്പത് മീറ്ററോളം വലിച്ചിഴച്ചാണ് റോഡിലിട്ടത്. തലയുടെ പുറക് വശത്താണ് ഇയാള്ക്ക് വലിയ പരിക്കുള്ളത്.
കുറ്റ്യാടി പോലീസ് സ്ഥലത്തെത്തിയാണ് വിഷ്ണുവിനെ ആശുപത്രിയില് എത്തിച്ചത്. അതീവ ഗുരുതരാവസ്ഥയില് വെന്റിലേറ്റര് സഹായത്തിലാണ് ചികിത്സ. മര്ദ്ദിച്ചയാള്ക്കായി പോലീസ് തിരച്ചില് ശക്തമാക്കി. കുറ്റ്യാടി സി.ഐ സി.കെ. ഷിജുവിന്റെ നേതൃത്വത്തിലാണ് അന്വേഷണം. മര്ദ്ദിച്ചയാള് ഒളിവിലാണ്. ഫോറന്സിക്ക് വിദഗ്ദര് സ്ഥലത്ത് പരിശോധന നടത്തിയിരുന്നു. സിസിടിവി ദൃശ്യങ്ങള് ഉള്പ്പടെ ശേഖരിച്ചാണ് അന്വേഷണം പുരോഗമിക്കുന്നതെന്ന് പോലീസ് അറിയിച്ചു.
