കോഴിക്കോട് : സ്പീക്കറുടെ കസേര മറിച്ചിട്ട് ചവിട്ടി തെറിപ്പിച്ചത് സത്യപ്രതിജ്ഞാ ചട്ടത്തില്‍ ഉള്‍പ്പെട്ടതായിരുന്നോയെന്ന് വടകര എം.എല്‍.എ കെ.കെ രമ. ടി.പി ചന്ദ്രശേഖരന്റെ ബാഡ്ജ് ധരിച്ച്‌ സഭയിലെത്തി സത്യപ്രതിജ്ഞ ചെയ്ത സംഭവം സത്യപ്രതിജ്ഞാ ലംഘനമാണോയെന്ന് പരിശോധിക്കുമെന്ന് സ്പീക്കര്‍ എം.ബി രാജേഷ് പറഞ്ഞിരുന്നു. ഇതുമായി ബന്ധപ്പെട്ട് പ്രതികരിക്കുകയായിരുന്നു കെ.കെ രമ.
ഇതിലും വലുത് പ്രതീക്ഷിച്ചതാണെന്നും ആദ്യം മുതല്‍ക്ക് തന്നെ എന്റെ പുറകെ തന്നെയാണ് ഇവരെന്നും കെ.കെ രമ പറഞ്ഞു. എന്റെ വസ്ത്രത്തിന്റെ ഭാഗമായിട്ടാണ് ഞാന്‍ ആ ബാഡ്ജ് ധരിച്ചെത്തിയത്. ചട്ടലംഘനമൊന്നുമില്ല. എല്ലാം പരിശോധിച്ച്‌ തന്നെയാണ് ഞങ്ങളും അങ്ങനെ ചെയ്തത്. സ്പീക്കര്‍ പരിശോധിക്കട്ടെയെന്നും എന്നിട്ട് തൂക്കി കൊല്ലാന്‍ വിധിക്കുന്നെങ്കില്‍ അങ്ങനെ ചെയ്യട്ടേയെന്നും രമ പ്രതികരിച്ചു.
കാലങ്ങളായുള്ള ഇടത് കുത്തക തകര്‍ത്തായിരുന്നു യുഡിഎഫ്‌ പിന്തുണയോടെ വടകരയില്‍ നിന്ന് ആര്‍.എം.പി സ്ഥാനാര്‍ഥിയായി മത്സരിച്ച കെ.കെ രമ വിജയിച്ചത്. തുടര്‍ന്ന് കൊല്ലപ്പെട്ട ആര്‍.എം.പി നേതാവും ഭര്‍ത്താവുമായ ടി.പി ചന്ദ്രശേഖരന്റെ ഫോട്ടോ പതിച്ച ബാഡ്ജ് ധരിച്ച്‌ കെ.കെ രമ സത്യപ്രതിജ്ഞ ചെയ്തതും വലിയ ചര്‍ച്ചയായിരുന്നു.
