തിരുവനന്തപുരം : മുന് ആരോഗ്യ മന്ത്രി കെ.കെ ശൈലജ ടീച്ചര്ക്ക് രമണ് മഗ്സസെ പുരസ്കാരം ലഭിച്ചിട്ടും സ്വീകരിക്കേണ്ടെന്ന് സി.പി.എം തീരുമാനം എടുത്തതായി റിപ്പോര്ട്ട്. ‘ദി ന്യൂ ഇന്ത്യന് എക്സ്പ്രസ്’ ദിനപത്രമാണ് സുപ്രധാന വാര്ത്ത പ്രസിദ്ധീകരിച്ചത്. മുന് ആരോഗ്യമന്ത്രിയും മുതിര്ന്ന സി.പി.എം നേതാവുമായ കെ.കെ ശൈലജക്ക് 2022ലെ രമണ് മഗ്സസെ അവാര്ഡ് ലഭിക്കാനുള്ള അവസരം പാര്ട്ടി ഇതോടെ ഇല്ലാതാക്കിയതായി പത്രം റിപ്പോര്ട്ട് ചെയ്യുന്നു. രണ്ട് പതിറ്റാണ്ട് മുമ്പ് മുതിര്ന്ന നേതാവ് ജ്യോതിബസു പ്രധാനമന്ത്രിപദം നിരസിച്ചതിന് ശേഷം സി.പി.എം തങ്ങളുടെ രണ്ടാമത്തെ ‘ചരിത്ര മണ്ടത്തരം’ ആവര്ത്തിച്ചു എന്നാണ് ‘ദി ന്യൂ ഇന്ത്യന് എക്സ്പ്രസ്’ ഇതിനെ വിശേഷിപ്പിച്ചിരിക്കുന്നത്.
സംസ്ഥാനത്ത് നിപ, കോവിഡ് 19 പൊട്ടിപ്പുറപ്പെടുന്നത് നിയന്ത്രിക്കുന്നതിന് മുന്നില് നിന്ന് ഫലപ്രദമായി നേതൃത്വം നല്കുന്ന പൊതുജനാരോഗ്യ സംവിധാനം ഉറപ്പാക്കുന്നതിലെ പ്രതിബദ്ധതക്കും സേവനത്തിനുമാണ് രമണ് മഗ്സസെ അവാര്ഡ് ഫൗണ്ടേഷന് ശൈലജയെ 64-ാമത് മഗ്സസെ അവാര്ഡിന് തെരഞ്ഞെടുത്തത്. നിപ ബാധയും കോവിഡ് പകര്ച്ചവ്യാധിയും ഫലപ്രദമായി കൈകാര്യം ചെയ്തതിന് കേരളം ആഗോള അംഗീകാരം നേടിയിരുന്നു.
ഇന്ത്യയുടെ തെക്കേ അറ്റത്തുള്ള ഒരു ചെറിയ സംസ്ഥാനം എങ്ങനെ ശാസ്ത്രീയമായ രീതിയില് മഹാമാരിക്കെതിരെ പോരാടുന്നു എന്ന് എടുത്തുകാണിച്ച വിവിധ ദേശീയ അന്തര്ദേശീയ മാധ്യമങ്ങള് ശൈലജയെ പ്രാധാന്യത്തോടെ അവതരിപ്പിച്ചു. ഈ വര്ഷം ആഗസ്റ്റ് അവസാനത്തോടെ അവാര്ഡിന്റെ പൊതു പ്രഖ്യാപനം നടത്തേണ്ടതായിരുന്നു. അവരെ നോമിനേറ്റ് ചെയ്തതിന് ശേഷം ഫൗണ്ടേഷന് രാജ്യത്തെ ഏതാനും പ്രമുഖ സ്വതന്ത്രരായ ആളുകളുമായി ക്രോസ് ചെക്ക് നടത്തിയിരുന്നു.
ഒരു ഓണ്ലൈന് ആശയവിനിമയത്തിനിടെ ഫൗണ്ടേഷന് ആദ്യം ശൈലജയെ പരിഗണിച്ചെന്നും പിന്നീട് ജൂലൈ അവസാനത്തോടെ അവാര്ഡ് വിവരം അറിയിച്ചുവെന്നും പ്രമുഖര് വെളിപ്പെടുത്തിയതായി പത്രം അവകാശപ്പെടുന്നു. അന്താരാഷ്ട്ര ബഹുമതിക്ക് തെരഞ്ഞെടുക്കപ്പെട്ട വിവരം അറിയിച്ചുകൊണ്ട് മുന് മന്ത്രിക്ക് അയച്ച ഇ-മെയിലില്, അവാര്ഡ് സ്വീകരിക്കാനുള്ള അവരുടെ സന്നദ്ധത രേഖാമൂലം അറിയിക്കാന് ഫൗണ്ടേഷന് ആവശ്യപ്പെട്ടു. 2022 സെപ്റ്റംബര് മുതല് നവംബര് വരെ അവാര്ഡുമായി ബന്ധപ്പെട്ട മറ്റ് പ്രവര്ത്തനങ്ങളും ഫൗണ്ടേഷന് ഷെഡ്യൂള് ചെയ്തിരുന്നു.
സി.പി.എമ്മിന്റെ കേന്ദ്രകമ്മിറ്റി അംഗമായ ശൈലജ ഇതേക്കുറിച്ച് പാര്ട്ടി നേതൃത്വവുമായി ആലോചിച്ചിട്ടുണ്ടെന്നാണ് വിശ്വസനീയമായ വിവരം. അവാര്ഡിന്റെ വിവിധ വശങ്ങള് പരിശോധിച്ച നേതൃത്വം, അത് സ്വീകരിക്കേണ്ട എന്ന് തീരുമാനിച്ചു. ആരോഗ്യമന്ത്രി എന്ന നിലയില് പാര്ട്ടി ഏല്പ്പിച്ച കടമ മാത്രമാണ് ശൈലജ നിര്വഹിക്കുന്നതെന്ന് പാര്ട്ടി കരുതുന്നു. കൂടാതെ, നിപ്പ പൊട്ടിപ്പുറപ്പെടുന്നതിനും കോവിഡ് പാന്ഡെമിക്കിനുമെതിരായ സംസ്ഥാനത്തിന്റെ ശ്രമങ്ങള് ഒരു കൂട്ടായ പ്രസ്ഥാനത്തിന്റെ ഭാഗമായിരുന്നു. അതിനാല് അവരുടെ വ്യക്തിഗത ശേഷിയില് അവാര്ഡ് സ്വീകരിക്കേണ്ടതില്ല എന്നായിരുന്നു പാര്ട്ടി നിലപാട്.
ഇതേത്തുടര്ന്ന് അവാര്ഡ് സ്വീകരിക്കാന് കഴിയില്ലെന്ന് കാണിച്ച് ശൈലജ ഫൗണ്ടേഷന് കത്തയച്ചു. കമ്മ്യൂണിസ്റ്റ് ഗറില്ലകളെ ഒതുക്കുന്നതില് പേരുകേട്ട മഗ്സസെയുടെ പേരിലുള്ളതിനാല് അവാര്ഡ് സ്വീകരിക്കരുതെന്ന് പാര്ട്ടി തീരുമാനിച്ചതായും അറിയുന്നതായി ‘ദി ന്യൂ ഇന്ത്യന് എക്സ്പ്രസ്’ റിപ്പോര്ട്ട് ചെയ്യുന്നു. ഇത്തരമൊരു അവാര്ഡ് സ്വീകരിക്കുന്നത് ദീര്ഘകാലാടിസ്ഥാനത്തില് തിരിച്ചടിയാകുമെന്ന് സി.പി.എമ്മിന് തോന്നി. സി.പി.എം ജനറല് സെക്രട്ടറി സീതാറാം യെച്ചൂരിയെ ബന്ധപ്പെടാന് ശ്രമിച്ചെങ്കിലും ലഭ്യമായില്ല എന്ന് പത്രം പറയുന്നു.
ശൈലജ ടീച്ചര് CPM scuttled Ramon Magsaysay Award for KK Shailaja പ്രതികരിക്കാന് തയ്യാറായില്ല. ഏഷ്യയുടെ നോബല് സമ്മാനമായി പരക്കെ അറിയപ്പെടുന്ന രമണ് മഗ്സസെ അവാര്ഡ് അന്തരിച്ച ഫിലിപ്പീന്സ് പ്രസിഡന്റിന്റെ പേരിലുള്ള അന്തര്ദേശീയ ബഹുമതിയാണ്. ശൈലജയെ അവാര്ഡ് സ്വീകരിക്കാന് പാര്ട്ടി അനുവദിച്ചിരുന്നെങ്കില് മഗ്സസെ പുരസ്കാരം കിട്ടുന്ന ആദ്യ മലയാളി വനിതയായി അവര് അറിയപ്പെടുമായിരുന്നു എന്നും ‘ദി ന്യൂ ഇന്ത്യന് എക്സ്പ്രസ്’ റിപ്പോര്ട്ട് ചെയ്യുന്നു.
