തിരുവനന്തപുരം: കേന്ദ്രത്തിന്റെ നടപടികള് മൂലം സംസ്ഥാനം കടുത്ത സാമ്പത്തിക പ്രതിസന്ധി നേരിടുകയാണെന്ന് ചൂണ്ടിക്കാണിച്ച് സംസ്ഥാന സര്ക്കാര് കേന്ദ്ര ധനമന്ത്രാലയത്തിന് കത്തയച്ചു. റവന്യൂ കമ്മി, ഗ്രാന്റുകളിലെ കുറവ്, ജിഎസ്ടി നഷ്ടപരിഹാരം നിര്ത്തലാക്കല് എന്നിവ ഈ വര്ഷം സംസ്ഥാനത്തിന്റെ സാമ്പത്തിക ആരോഗ്യത്തെ സാരമായി ബാധിച്ചു. സംസ്ഥാനത്തിന്റെ വായ്പാ പരിധി ധനമന്ത്രാലയം ഏകപക്ഷീയമായി കുറച്ചതായി ധനമന്ത്രി കെ എന് ബാലഗോപാല് കേന്ദ്രത്തിന് അയച്ച കത്തില് പറഞ്ഞു.
കിഫ്ബിയും പെന്ഷന് കമ്പനിയും എടുത്ത വായ്പ സംസ്ഥാനത്തിന്റെ കടപ്പത്ര അക്കൗണ്ടില് ഉള്പ്പെടുത്തരുതെന്നും ബാലഗോപാല് ആവശ്യപ്പെട്ടു. കേന്ദ്രസര്ക്കാരിന്റെ ഏകപക്ഷീയമായ തീരുമാനങ്ങള് ഭരണഘടനാപരമായ അവകാശങ്ങളുടെ ലംഘനമാണെന്ന് മന്ത്രി ചൂണ്ടിക്കാട്ടി. കിഫ്ബിയും പെന്ഷന് കമ്പനിയായ സോഷ്യല് സെക്യൂരിറ്റി പെന്ഷന് ലിമിറ്റഡും വഴി എടുത്ത 14,000 കോടി രൂപയുടെ കടം കേരളത്തിന്റെ കടമെടുക്കല് പരിധിയില് ഉള്പ്പെടുത്തിയതായി കാണിച്ച് കേന്ദ്രസര്ക്കാര് സംസ്ഥാനത്തിന് നോട്ടീസ് നല്കിയിരുന്നു. ഇതിനെതിരെയാണ് കെ.എന്. ബാലഗോപാലിന്റെ കത്ത്.