കല്പറ്റ : ഭാര്യയെ ആക്രമിച്ച കേസില്‍ വയനാട് പുല്പള്ളിയിലെ റൗഡി കോടാലി ഷിജു അറസ്റ്റില്‍. സ്ഥിരം പ്രതിയും ഒരുപാട് കേസുകളിലെ പ്രതിയുമായ പുല്പള്ളി അമരക്കുനി സ്വദേശി ഷിജു ഗള്‍ഫില്‍ ജോലി ചെയ്യുന്ന ഭാര്യയെ വിമാന ടിക്കറ്റ് ഉള്‍പ്പെടെ എടുത്ത് നല്‍കി നാട്ടിലെത്തിച്ച ശേഷമാണ് ആക്രമിച്ചത്. കല്പറ്റ, ബത്തേരി, കേണിച്ചിറ, പുല്പള്ളി സ്റ്റേഷനുകളിലായി 13 കേസുകളില്‍ പ്രതിയാണ് ഷിജുവെന്ന് പോലീസ് പറഞ്ഞു.
വ്യാഴാഴ്ച പുലര്‍ച്ചെ രണ്ടരയോടെയാണ് ഭാര്യ പ്രസീതയെ (44) ഷിജു ആക്രമിച്ചതെന്ന് പോലീസ് പറഞ്ഞു. ഈ മാസം പത്തിനാണ് പ്രസീത നാട്ടിലെത്തിയത്. നാല് വര്‍ഷമായി ഗള്‍ഫില്‍ ജോലി ചെയ്യുകയാണ് ഷിജുവിന്റെ ഭാര്യ. പ്രസീതയ്ക്ക് വിമാന ടിക്കറ്റ് ഉള്‍പ്പെടെ എടുത്ത് നല്‍കിയത് ഷിജുവാണ്. നാട്ടിലെത്തിയ ശേഷം കുടുംബമായി വിനോദസഞ്ചാരകേന്ദ്രങ്ങളില്‍ പോയി. കഴിഞ്ഞ ദിവസമാണ് കല്പറ്റ അമ്പിലേരിയിലെ ആലക്കല്‍ അപ്പാര്‍ട്ട്‌മെന്റിലെ താമസസ്ഥലത്തെത്തിയത്. ബുധനാഴ്ച രാത്രി എട്ടുമണിവരെ ഷിജു വീട്ടിലുണ്ടായിരുന്നു.
പിന്നീട് പുല്പള്ളിയിലെ വീട്ടിലേക്കുപോയി. ഇതിനു ശേഷം ഭാര്യയുമായി ഫോണില്‍ വിളിച്ച്‌ സംസാരിക്കുന്നതിനിടെ ഭാര്യയുമായി വാക്കുതര്‍ക്കമുണ്ടായി. ഇതിനുപിന്നാലെ അമ്പിലേരിയില്‍ തിരിച്ചെത്തിയ ഷിജു ഭാര്യയെ ആക്രമിക്കുകയായിരുന്നുവെന്ന് പോലീസ് പറഞ്ഞു. പ്രസീതയ്ക്ക് തലയ്ക്കും കൈക്കുമാണ് വെട്ടേറ്റത്.
ഗുരുതരമായി പരിക്കേറ്റ ഇവര്‍ സ്വകാര്യാശുപത്രിയില്‍ ചികിത്സയിലാണ്. വിദ്യാര്‍ഥിയായ മകളും ആക്രമണം നടക്കുന്ന സമയം വീട്ടിലുണ്ടായിരുന്നു. ഭാര്യയെ ആക്രമിച്ച്‌ വാരിയെല്ലൊടിച്ചതിന് അഞ്ചുവര്‍ഷം മുമ്പും ഷിജുവിന് നേരേ കേസുണ്ടെന്ന് പോലീസ് പറഞ്ഞു. കര്‍ണാടകയിലേക്ക് ഒളിവില്‍ പോകാനുള്ള ശ്രമത്തിനിടെ വൈകീട്ട് ആറരയോടെ പുല്പള്ളിയില്‍ നിന്നാണ് ഷിജുവിനെ അറസ്റ്റുചെയ്യുന്നത്.
