കൊടുമണ് : പത്തനംതിട്ടയില് വീണ്ടും നിക്ഷേപ തട്ടിപ്പ്. കൊടുമണ് ആന്സ് ബാങ്കേഴ്സ് ഉടമ ജോസിനെ കൊടുമണ് പോലീസ് അറസ്റ്റ് ചെയ്തു. കൊടുമണ് ജംഗ്ഷനില് കഴിഞ്ഞ ഇരുപതോളം വര്ഷമായി പ്രവര്ത്തിച്ചുവന്ന സ്വകാര്യ പണമിടപാട് സ്ഥാപനമാണ് ആന്സ് ബാങ്കേഴ്സ്. കൊടുമണ് സ്റ്റാര് വ്യൂ കോട്ടേജില് ജോസ് തോമസ് ആയിരുന്നു ഉടമ. കഴിഞ്ഞ നാലുമാസമായി സ്ഥാപനം പൂട്ടിയ നിലയിലാണ്. ഇതേതുടര്ന്ന് പണയ ഇടപാടുകാര് കൊടുമണ് പോലീസില് പരാതി നല്കിയിരുന്നു. നിക്ഷേപവും സ്വര്ണ്ണ പണയവും ഇവിടെ ഉണ്ടായിരുന്നു.
പണയ ഇടപാടുകാരില് ബഹുഭൂരിപക്ഷവും സാധാരണക്കാരോ പാവപ്പെട്ടവരോ ആണ്. പണയമായി ലഭിച്ച സ്വര്ണ്ണം മറ്റ് സ്വകാര്യ ധനകാര്യ സ്ഥാപനങ്ങളില് കൂടുതല് തുകക്ക് പണയം വെച്ച് ആ തുകയും വകമാറ്റിയെന്നു സംശയിക്കുന്നു. പണയം എടുക്കാന് വന്നവര് വിളിച്ചിട്ട് ഫോണ് എടുക്കാതായതോടെയാണ് ഇവര് പോലീസില് പരാതി നല്കിയത്. സ്ഥാപനം പൂട്ടി ഇയാള് ഒളിവില് ആയിരുന്നു. കൊടുമണ് സി.ഐ മഹേഷ് കുമാറിന്റെ നേത്രുത്വത്തില് എസ്.ഐ.അനൂപ്, എ.എസ്.ഐ സന്തോഷ്, സി.പി.ഒ പ്രദീപ് എന്നിവരടങ്ങുന്ന സംഘം ഇന്നലെ രാത്രിയോടെ തിരുവനന്തപുരത്തെത്തി ഇയാളെ അറസ്റ്റ് ചെയ്യുകയായിരുന്നു. പ്രതിയെ ഇന്ന് കോടതിയില് ഹാജരാക്കും.
