മുംബൈ : മഹാരാഷ്ട്രയിലെ കോലാപ്പുര് നോര്ത്ത് നിയമസഭ മണ്ഡലത്തില് നടന്ന ഉപതെരഞ്ഞെടുപ്പില് കോണ്ഗ്രസിന് ജയം. ജയശ്രീ ജാദവ് 18,800 വോട്ടിന്റെ ഭൂരിപക്ഷത്തിനാണ് ജയിച്ചത്. കോണ്ഗ്രസ് വിട്ട് ബി.ജെ.പിയില് ചേര്ന്ന സത്യജിത്ത് കദമിനെയാണ് ജയശ്രീ പരാജയപ്പെടുത്തിയത്. ജയശ്രീ 96,226 വോട്ടുകള് നേടിയപ്പോള് 77,426 വോട്ടുകളാണ് സത്യജിത്ത് കദമിന് ലഭിച്ചത്.
ഭരണ സഖ്യമായ ശിവസേന, എന്.സി.പി, കോണ്ഗ്രസ് മഹാ വികാസ് അഗാഡിയുടെ നേട്ടമായാണ് ജയശ്രീയുടെ വിജയത്തെ കാണുന്നത്. ശിവസേനയുടെ തട്ടകമായിരുന്ന കോലാപ്പുര് നോര്ത്ത് മണ്ഡലം ചന്ദ്രകാന്ത് ജാദവിലൂടെ 2019ല് കോണ്ഗ്രസ് പിടിച്ചെടുക്കുകയായിരുന്നു. പിന്നീടാണ് ബി.ജെ.പിക്കെതിരെ മഹാ വികാസ് അഗാഡി രൂപപ്പെട്ടത്. ചന്ദ്രകാന്ത് ജാദവ് കോവിഡ് ബാധിച്ച് മരിച്ചതോടെയാണ് ഉപ തെരഞ്ഞെടുപ്പിന് കളമൊരുങ്ങിയത്. ചന്ദ്രകാന്തിന്റെ വിധവയാണ് ജയശ്രീ.
