ന്യൂഡല്ഹി : കോണ്ഗ്രസില് ചേരുമെന്ന അഭ്യൂഹങ്ങള്ക്കിടെ ഗാന്ധി കുടുംബത്തെ നേരിട്ട് കണ്ട് തെരഞ്ഞെടുപ്പ് തന്ത്രജ്ഞന് പ്രശാന്ത് കിഷോര്. പാര്ട്ടി അധ്യക്ഷ സോണിയ ഗാന്ധി, രാഹുല് ഗാന്ധി, കെ.സി. വേണുഗോപാല് എന്നിവരുമായി പ്രശാന്ത് കൂടിക്കാഴ്ച നടത്തി. വരാനിരിക്കുന്ന നിയമസഭ തെരഞ്ഞെടുപ്പുകളും 2024ലെ ലോക്സഭ തെരഞ്ഞെടുപ്പിനും മുന്നോടിയായി കോണ്ഗ്രസിനെ ശക്തിപ്പെടുത്തുന്നതിന് കിഷോര് അടുത്തിടെയാണ് നേതൃത്വവുമായി ചര്ച്ച പുനരാരംഭിച്ചത്.
പാര്ട്ടിയെ പുനരുജ്ജീവിപ്പിക്കുന്നത് സംബന്ധിച്ച് കഴിഞ്ഞ വര്ഷം നിരവധി തവണ നേതൃത്വവുമായി ചര്ച്ച നടത്തിയിരുന്നെങ്കിലും ഒന്നും ഫലം കണ്ടിരുന്നില്ല. ഈ വര്ഷാവസാനം ഗുജറാത്തില് നടക്കുന്ന നിയമസഭാ തെരഞ്ഞെടുപ്പു കേന്ദ്രീകരിച്ചാണ് ചര്ച്ച നടക്കുന്നതെന്ന കോണ്ഗ്രസ് നേതൃത്വത്തിന്റെ വാദം കിഷോറിന്റെ അടുത്ത വൃത്തങ്ങള് തള്ളിക്കളഞ്ഞു.
കോണ്ഗ്രസ് നേതൃത്വവും പ്രശാന്ത് കിഷോറും 2024ലെ ദേശീയ തെരഞ്ഞെടുപ്പാണ് പ്രധാനമായും ചര്ച്ച ചെയ്യുന്നതെന്നാണ് ഇവര് പറയുന്നത്. പാര്ട്ടിയില് അടിമുടി മാറ്റംവേണമെന്ന കിഷോറിന്റെ നിലപാട് രാഹുല് ഗാന്ധിയും മറ്റും അംഗീകരിക്കുന്നില്ല. ഇതാണ് അദ്ദേഹത്തിന്റെ പാര്ട്ടി പ്രവേശനം വൈകിപ്പിക്കുന്നതും. ഉപദേശക സ്ഥാനം ഏറ്റെടുക്കാതെ കിഷോര് കോണ്ഗ്രസില് ചേരുമെന്നത് ഇപ്പോഴും വിദൂര സാധ്യതയാണെന്നും അടുത്ത വൃത്തങ്ങള് പറയുന്നു.
