ചെറുവത്തൂര്: കൊല്ക്കത്തയില്നിന്ന് തൊഴിലാളികളുമായെത്തിയ ബസ് കാലിക്കടവില് തടഞ്ഞു. കൊല്ക്കത്തയില്നിന്ന് 200 കിലോമീറ്റര് ദൂരെയുള്ള കിനാല് ഗട്ടിയില്നിന്ന് 48 തൊഴിലാളികളുമായെത്തിയ ബസാണ് കാലിക്കടവ് ടൗണില് നാട്ടുകാര് തടഞ്ഞത്. ജില്ലയുടെ വിവിധ ഭാഗങ്ങളിലേക്ക് തൊഴില് ചെയ്യാന് എത്തിയവരായിരുന്നു. ഇതില് ഒരു സ്ത്രീയും കുട്ടിയുമുണ്ടായിരുന്നു.
പടന്നയിലെ ഏജന്റ് മുഖേന എത്തിച്ച തൊഴിലാളികളെ കാലിക്കടവില് ഇറക്കി താമസസ്ഥലങ്ങളിലേക്ക് കൊണ്ടുപോകാനുള്ള ശ്രമമാണ് തടഞ്ഞത്. ടൗണില് തൊഴിലാളികള് ഇറങ്ങി നടന്നതാണ് നാട്ടുകാരെ ചൊടിപ്പിച്ചത്. തുടര്ന്ന് ചന്തേര പോലീസ് എത്തിയാണ് രംഗം ശാന്തമാക്കിയത്. തൊഴിലാളികളെ അവര് താമസിക്കുന്ന ക്വാര്ട്ടേഴ്സുകളില് വന്ന ബസില്തന്നെ എത്തിക്കണമെന്നും, 14 ദിവസത്തെ ക്വാറന്റീന് വേണമെന്നും പോലീസ് നിര്ദേശിച്ചു.
എറണാകുളത്തെ ട്രാവല് ഏജന്സി ഏര്പ്പെടുത്തിയ ബസിലാണ് കൊല്ക്കത്തയില്നിന്ന് തൊഴിലാളികളെ കൊണ്ടുവന്നത്. ജില്ല അതിര്ത്തിയിലെ ചെക്ക്പോസ്റ്റില് റിപ്പോര്ട്ട് ചെയ്യാതെ ബസ് വന്നതും നാട്ടുകാരെ ക്ഷുഭിതരാക്കി.
