കോട്ടയം: വാഹനാപകടത്തില് മരിച്ച നടന് കൊല്ലം സുധി ഇനി ഓര്മ. ഉച്ചകഴിഞ്ഞ് രണ്ട് മണിക്ക് കോട്ടയം തോട്ടക്കാട് റീഫോര്മിഡ് ആഗ്ലിക്കന് ചര്ച്ച് ഓഫ് ഇന്ത്യ ചര്ച്ച് സെമിത്തേരിയില് വന്ജനാവലിയുടെ സാന്നിധ്യത്തില് സംസ്കാര ചടങ്ങുകള് നടന്നു. രാവിലെ ഏഴര മുതല് കോട്ടയം വാകത്താനം പൊങ്ങന്താനത്തുള്ള സുധിയുടെ വീട്ടിലും പിന്നീട് പൊങ്ങന്താനം യു പി സ്കൂള്, വാകത്താനം പഞ്ചായത്ത് കമ്യൂണിറ്റി ഹാള് എന്നിവിടങ്ങളിലും മൃതദേഹം പൊതു ദര്ശനത്തിന് വെച്ചു. ഉച്ചയ്ക്ക് ഒന്നരയോടെ വിലാപയാത്രയായാണ് മൃതദേഹം സെമിത്തേരിയില് എത്തിച്ചത്. സുധിക്ക് അന്ത്യാഞ്ജലി അര്പ്പിക്കാന് മിമിക്രി, സിനിമാ, സാംസ്കാരിക-സാമൂഹ്യ രംഗത്തെ നിരവധി പേരാണ് എത്തിയത്.
ഇന്നലെ പുലര്ച്ചെ തൃശൂര് കയ്പമംഗലത്ത് വെച്ച് ഉണ്ടായ അപകടത്തിലാണ് കൊല്ലം സുധി മരിച്ചത്. വടകരയില് നിന്നും പരിപാടി കഴിഞ്ഞ് മടങ്ങിയ സംഘം സഞ്ചരിച്ചിരുന്ന കാര് എതിരെ വന്ന പിക്കപ്പ് വാനുമായി കൂട്ടിയിടിക്കുകയായിരുന്നു. അപകടത്തില് പരിക്കേറ്റ് ചികിത്സയില് കഴിയുന്ന ബിനു അടിമാലിയുടെയും ഡ്രൈവര് ഉല്ലാസിന്റെയും ആരോഗ്യനിലയില് പുരോഗതിയുണ്ട്. ബിനു അടിമാലി തീവ്രപരിചരണ വിഭാഗത്തില് നിരീക്ഷണത്തിലാണ്. അപകടനില തരണം ചെയ്തിട്ടുണ്ടെന്നാണ് വിവരം.
