കോന്നി: അമിത വേഗത്തിൽ പോയ വാഹനത്തിൽ നിന്ന് പാചകവാതക സിലിണ്ടർ തെറിച്ച് വീണ് അഞ്ചു വയസുകാരന്റെ കാൽ ഒടിഞ്ഞു. കോന്നി മരങ്ങാട് സോപാനത്തിൽ ബിജുകുമാർ – ലതിക ദമ്പതികളുടെ മകൻ രോഹിതിന്റെ (5) കാലാണ് ഒടിഞ്ഞത്.
തിങ്കളാഴ്ച ഉച്ചക്കാണ് സംഭവം. റോഡിന്റെ വശത്തെ താഴ്ന്ന ഭാഗത്താണ് രോഹിതിന്റെ വീട്. വീടിന്റെ സിറ്റൗട്ടിൽ പഠിച്ചു കൊണ്ടിരിക്കുമ്പോൾ റോഡിലൂടെ പോയ ഐ.ഒ.സി ഗ്യാസ് ഏജൻസിയുടെ വാഹനത്തിൽ നിന്നാണ് സിലിണ്ടർ തെറിച്ച് വീണത്. വാഹനത്തിന്റെ പുറകിലത്തെ ഡോർ തുറന്ന് മൂന്ന് സിലണ്ടറുകളാണ് റോഡിൽ വീണത്. അതിലൊരെണ്ണമാണ് രോഹിതിന്റെ കാലിൽ വീണത്. തെറിച്ച് വീണ സിലിണ്ടർ വീടിന്റെ സിറ്റൗട്ടിൽ കിടന്ന മേശയും മറിച്ചിട്ടു. ഇളകൊള്ളൂരിലെ ഗ്യാസ് ഗോഡൗണിലേക്ക് സിലിണ്ടറുകളെടുക്കാൻ അമിത വേഗത്തിൽ പോയതാണ് വാഹനം. രോഹിത് കോന്നി ഗവ: എൽ.പി. എസിലെ പ്രീ പ്രൈമറി വിദ്യാർത്ഥിയാണ്. കോന്നി താലൂക്കാശുപത്രിയിലെ പ്രാഥമീക ശുശ്രൂഷയ്ക്ക് ശേഷം പത്തനംതിട്ടയിലെ സ്വകാര്യ ആശുപത്രിയിൽ പ്രവേശിപ്പിച്ചു. പോലീസ് കേസെടുത്തു.
