കോന്നി: നാലു വർഷമായി സമ്പാദ്യ കുടുക്കയിൽ ശേഖരിച്ചു വച്ചിരുന്ന നാണയ തുട്ടുകൾ എടുത്ത് ആഹാരസാധനങ്ങൾ വാങ്ങി കെ.യു.ജനീഷ് കുമാർ എം.എൽ.എയുടെ കൈത്താങ്ങ് പദ്ധതിയിലൂടെ അവശത അനുഭവിക്കുന്ന ജനങ്ങൾക്ക് നല്കി 27 വയസ്സുകാരനായ യുവകർഷകൻ.
വകയാർ സ്വദേശിയായ മേക്കാട്ട് വീട്ടിൽ അലൻ.എ.തോമസ്സാണ് കൈത്താങ്ങ് ഹെൽപ്പ് ഡസ്കിൽ 100 കിലോ പഞ്ചസാരയും, 26 കിലോ വെളിച്ചെണ്ണയും എത്തിച്ചത്. പാട്ടത്തിന് സ്ഥലമെടുത്ത് വാഴകൃഷി നടത്തുന്ന അലൻ കയ്യിൽ ലഭിക്കുന്ന പത്ത്, അഞ്ച് രൂപ നാണയങ്ങൾ കുടുക്കയിൽ കഴിഞ്ഞ നാല് വർഷമായി സൂക്ഷിച്ചു വെച്ചിരുന്നു. ലോക്ക് ഡൗണിനെ തുടർന്ന് തൊഴിലാളി കുടുംബങ്ങൾ ബുദ്ധിമുട്ടുന്നതു മനസ്സിലാക്കിയ അലൻ കുടുക്ക പൊട്ടിച്ച് അതിലുണ്ടായിരുന്ന തുക ഉപയോഗിച്ച് പഞ്ചസാരയും വെളിച്ചെണ്ണയും വാങ്ങി കിറ്റുകളിൽ നല്കാൻ വേണ്ടി ഏല്പിക്കുകയായിരുന്നു. കോളനി മേഖലയിൽ വിതരണത്തിനായി തയ്യാറാക്കുന്ന കിറ്റുകളിലാക്കി പഞ്ചസാരയും വെള്ളിച്ചെണ്ണയും വിതരണം ചെയ്യുമെന്ന് കൈത്താങ്ങ് പദ്ധതി പ്രവർത്തകർ അറിയിച്ചു.
