കോന്നി: കോന്നി കരിയാട്ടത്തിൻ്റെ ഭാഗമായുള്ള ടൂറിസം – വ്യവസായ – കാർഷിക പ്രദർശന വിപണനമേള നാളെ ഉദ്ഘാടനം ചെയ്യും. രാവിലെ 9 മണിക്ക് സംസ്ഥാന ഭക്ഷ്യ-പൊതുവിതരണ വകുപ്പ് മന്ത്രി ജി.ആർ.അനിലാണ് ഉദ്ഘാടനം നടത്തുന്നത്. അഡ്വ. കെ.യു.ജനീഷ് കുമാർ എം.എൽ.എ അദ്ധ്യക്ഷത വഹിക്കും. പ്രദർശന-വിപണന മേളയ്ക്കായി കൂറ്റൻ പന്തലാണ് കെ.എസ്.ആർ.ടി.സി മൈതാനിയിൽ സജ്ജമായിരിക്കുന്നത്. മേളയിൽ 200 ൽ അധികം സ്റ്റാളുകളാണ് ഉണ്ടാവുക. ആധുനിക നിലവാരത്തിലാണ് സ്റ്റാളുകൾ തയ്യാറാക്കിയിരിക്കുന്നത്. വിവിധ സർക്കാർ വകുപ്പുകളുടെ സ്റ്റാളുകൾ പ്രദർശനത്തിൻ്റെ ഭാഗമായി ഉണ്ടാകും. കോന്നിയുടെ ടൂറിസം സാധ്യതകളും – മനോഹാരിതയും ജനങ്ങൾക്ക് ബോധ്യമാക്കുന്ന പ്രദർശനം, കാർഷിക- വ്യവസായ-വനം വകുപ്പുകളുടെ സ്റ്റാളുകൾ എന്നിവ പ്രദർശനത്തിൻ്റെ പ്രത്യേകതയാകും.
സംസ്ഥാനത്തെ വിവിധ പൊതുമേഖലാ – സ്വകാര്യ മേഖലാ വ്യവസായശാലകൾ, ജ്വലറികൾ തുടങ്ങിയവയും പ്രദർശനത്തിൽ പങ്കെടുക്കുന്നുണ്ട്. ചെറുകിട വ്യവസായ സംരംഭകർ, കുടുംബശ്രീ, ഖാദി സംരഭങ്ങൾ തുടങ്ങിയവരുടെ ഉൽപന്നങ്ങൾ കാണാനും, വാങ്ങാനുമുള്ള സൗകര്യമുണ്ടാകും. മോട്ടോർ വാഹന രംഗത്തെ വിവിധ കമ്പനികൾ, ഇൻഷ്വറൻസ് കമ്പനികൾ തുടങ്ങിയവരും പ്രദർശനത്തിൽ പങ്കെടുക്കുന്നുണ്ട്. വിവിധ ഫലവർഗ്ഗങ്ങളുടെ തൈകൾ, അലങ്കാര ചെടികൾ തുടങ്ങിയവയുടെ വിപുലമായ ശേഖരം പ്രദർശന സ്ഥലത്ത് ഒരുക്കിയിട്ടുണ്ട്.
ഓണക്കാലത്ത് കേരളത്തിൽ നടക്കുന്ന ഏറ്റവും മികച്ച പ്രദർശന വിപണനമേളയാകും കോന്നിയിൽ നടക്കുകയെന്ന് അഡ്വ.കെ.യു.ജനീഷ് കുമാർ എം.എൽ.എ പറഞ്ഞു.പ്രദർശന വിപണനമേളയ്ക്കായുള്ള ഒരുക്കങ്ങൾ പൂർത്തിയായെന്നും എം.എൽ.എ പറഞ്ഞു.
