കോന്നി: കരിയാട്ടത്തിൻ്റെ ഭാഗമായി കുട്ടവഞ്ചികളുടെ തുഴച്ചിൽ മത്സരം നാളെ അടവിയിൽ നടക്കും. ഉച്ചയ്ക്ക് ശേഷം രണ്ട് മണിയ്ക്ക് നടക്കുന്ന മത്സരം ജില്ലാ കളക്ടർ പ്രേംകൃഷ്ണൻ ഐ.എ.എസ് ഫ്ലാഗ് ഓഫ് ചെയ്യും. സമാപന സമ്മേളനം സംസ്ഥാന കായിക വകുപ്പ് മന്ത്രി വി. അബ്ദുറഹ്മാൻ ഉദ്ഘാടനം ചെയ്യും. വിജയികൾക്കുള്ള സമ്മാനദാനവും നിർവ്വഹിക്കും. അഡ്വ. കെ.യു.ജനീഷ് കുമാർ എം.എൽ.എ അദ്ധ്യക്ഷത വഹിക്കും. ടൂറിസം വികസനം മുൻനിർത്തി നടത്തുന്ന കോന്നി കരിയാട്ടത്തിൻ്റെ ഭാഗമായാണ് 2023 മുതൽ കുട്ടവഞ്ചി തുഴച്ചിൽ മത്സരം അടവിയിൽ ആരംഭിച്ചത്.
പരിസ്ഥിതി സംരക്ഷണത്തിലൂടെയുള്ള ടൂറിസം വികസനം എന്ന കാഴ്ചപ്പാടിലാണ് അടവി ടൂറിസം കേന്ദ്രം പ്രവർത്തിക്കുന്നത്. ജില്ലയിലെ പരിസ്ഥിതി സൗഹൃദ ടൂറിസം കേന്ദ്രം എന്ന അംഗീകാരം അടവിക്ക് സർക്കാരിൽ നിന്ന് ലഭ്യമായിട്ടുണ്ട്. പരിസ്ഥിതി സൗഹൃദമായ ജലയാത്രയാണ് അടവി കട്ടവഞ്ചി സവാരി. ആയിരകണക്കിന് ജനങ്ങൾ മത്സരം കാണാൻ അടവിയിലെത്തുമെന്നാണ് സംഘാടക സമിതി വിലയിരുത്തുന്നത്. മത്സരത്തിന് എല്ലാ വിധ സുരക്ഷയും ഉറപ്പാക്കിയിട്ടുണ്ട്. അടവിയിലേക്ക് വിദേശ ടൂറിസ്റ്റുകളെ അടക്കം എത്തിക്കാൻ കുട്ടവഞ്ചി തുഴച്ചിൽ മത്സരം സഹായിക്കുമെന്ന് അഡ്വ. കെ.യു. ജനീഷ് കുമാർ എം.എൽ.എ പറഞ്ഞു.
