കോന്നി : കോന്നി – തണ്ണിത്തോട് റോഡില് ചെങ്ങറ മുക്കിനും കൊന്നപ്പാറയ്ക്കും ഇടയില് കോന്നി ഗ്രാമപഞ്ചായത്ത് റോഡിലേക്ക് ഇറക്കി സ്ഥാപിച്ച മിനി എം.സി.എഫ് വാഹനയാത്രക്കാര്ക്ക് ഭീഷണിയാകുന്നു. റോഡില് വാഹനങ്ങള് കടന്നുപോകുന്ന വെളുത്ത വരക്ക് ഉള്ളിലേക്ക് മാറിയാണ് മിനി എം.സി.എഫ് ന്റെ മേല്ക്കൂരയുടെ ഇരുമ്പ് ഷീറ്റുകള് നില്ക്കുന്നത്. കൊന്നപ്പാറ പാരിഷ്ഹാള് മുതല് ചെങ്ങറ മുക്ക് വരെയുള്ള ഭാഗത്ത് അപകടകരമായ വളവുകള് ഉള്ളതിനാല് റോഡിലൂടെ സഞ്ചരിക്കുന്ന വാഹനയാത്രക്കാര് ഇതിന് വളരെ അടുത്ത് എത്തിയ ശേഷം മാത്രമാകും അപകടം മനസിലാക്കുക. അപ്പോഴേക്കും അപകടം സംഭവിച്ചിരിക്കും.
രാവിലെ കോന്നിയിലേക്ക് പോയ സ്വകാര്യ ബസ് ഇതിന് അടുത്തെത്തിയപ്പോള് പെട്ടന്ന് ബ്രേക്ക് ഇട്ടതിനാല് അപകടം സംഭവിക്കാതെ രക്ഷപെടുകയായിരുന്നു. മേല്ക്കൂരയുടെ തകിട് ഷീറ്റുകള് ആളുകളുടെ ദേഹത്ത് തട്ടി അപകടം ഉണ്ടാവാതിരിക്കാന് പച്ചിലകള് കൊണ്ട് അപായ സൂചന ഒരുക്കിയിരിക്കുകയാണ് നാട്ടുകാര്. കൊന്നപ്പാറ തണ്ണിത്തോട് റോഡില് സഞ്ചരിക്കുന്ന സ്കൂള് വാഹനങ്ങള് അടക്കം ഈ അപകടക്കെണിയില് പെടുവാനുള്ള സാധ്യത വലുതാണ്. നാട്ടുകാരുടെ എതിര്പ്പ് ശക്തമായിട്ടും കോന്നി ഗ്രാമപഞ്ചായത്ത് ഇത് ഇവിടെ നിന്ന് മാറ്റി സ്ഥാപിക്കുന്നില്ല എന്നും പരാതിയുയരുന്നു.
