കോന്നി : കോന്നി താലൂക്ക് വികസന സമിതി പ്രഹസനമായി മാറുന്നു എന്ന് ആക്ഷേപം. സർക്കാർ തീരുമാന പ്രകാരം എല്ലാ മാസത്തേയും ആദ്യത്തെ ശനിയാഴ്ചയാണ് കോന്നി താലൂക്ക് വികസന സമിതി കൂടുന്നത്. ബന്ധപ്പെട്ട ഉദ്യോഗസ്ഥരും ജന പ്രതിനിധികളും രാഷ്ട്രീയ പ്രതിനിധികളും അടങ്ങുന്ന യോഗത്തിൽ കോന്നി മണ്ഡലത്തിലെ വിവിധ വിഷയങ്ങൾ ചർച്ച ചെയ്ത് പരിഹാരം കണ്ടിരുന്നു. എന്നാൽ ചില വ്യക്തികളുടെ സൗകര്യവും താല്പര്യവും പ്രകാരം കോന്നി താലൂക്ക് വികസന സമിതി യോഗം കൃത്യമായ ദിവസം നടത്താതെ മറ്റ് ദിവസങ്ങളിലേക്ക് മാറ്റി വെക്കുന്നത് പതിവാക്കുകയാണ്.
എന്നാൽ ഇത് യോഗത്തിലെ മറ്റ് പ്രതിനിധികളെ അറിയിക്കാതെ ആണ് തീരുമാനം എടുക്കുന്നതെന്നും ആക്ഷേപമുണ്ട്. കുടിവെള്ളവും പുനലൂർ മൂവാറ്റുപുഴ സംസ്ഥാന പാത നിർമ്മാണവും അടക്കമുള്ള നിരവധി പ്രശ്നങ്ങൾ ചർച്ച ചെയ്യുവാൻ ഉള്ളപ്പോഴാണ് വികസന സമിതി തീരുമാനിക്കുന്ന ദിവസം യോഗം മാറ്റിവെക്കുന്ന അധികൃതരുടെ ഈ നടപടി. യോഗം മാറ്റി വെക്കുന്ന ഈ നടപടിയിൽ പ്രതിഷേധം ശക്തമാണ്.
