കോന്നി : തണ്ണിത്തോട് മാതൃക ഫോറസ്റ്റ് സ്റ്റേഷന്റെ നിർമ്മാണം അവസാന ഘട്ടത്തിലേക്ക് എത്തുന്നു. ശുചിമുറികളുടെ പണികളും പ്ലമ്പിംഗ് ജോലികളും ഡോർമെറ്ററിയുടെ നിർമ്മാണ പ്രവർത്തനങ്ങളുമാണ് ഇപ്പോള് പൂര്ത്തിയായിക്കൊണ്ടിരിക്കുന്നത്. മികച്ച സൗകര്യങ്ങളോടുകൂടിയാണ് ഫോറസ്റ്റ് സ്റ്റേഷൻ നിർമ്മിക്കുന്നത്. കോന്നി തണ്ണിത്തോട് റോഡിൽ മുണ്ടോംമൂഴിക്ക് സമീപത്തായാണ് കെട്ടിടങ്ങൾ പൂര്ത്തിയായി വരുന്നത്.
നബാർഡ് പദ്ധതിയിൽ നിന്ന് 75 ലക്ഷം രൂപ ചെലവഴിച്ചാണ് കെട്ടിടങ്ങൾ നിർമ്മിക്കുന്നത്. രണ്ട് നിലകളുള്ള ഡോർമെറ്ററി കെട്ടിടവും ഒരു നിലയിൽ ഫോറസ്റ്റ് സ്റ്റേഷൻ കെട്ടിടവുമാണ് നിർമ്മിച്ചിട്ടുള്ളത്. ഫോറസ്റ്റ് സ്റ്റേഷൻ കെട്ടിടത്തിൽ ഡെപ്യൂട്ടി റേഞ്ച് ഫോറസ്റ്റ് ഓഫീസർ, വനിതാ ജീവനക്കാർ എന്നിവർക്കുള്ള മുറികളും ഇതിനോടനുബന്ധിച്ച് ശുചിമുറികളും നിർമ്മിച്ചിട്ടുണ്ട്.
റിക്കാർഡ് റൂം, സ്ട്രോംഗ് റൂം, സെൽ, ഹാൾ, ലിവിംഗ് റൂം, സിറ്റ് ഔട്ട്, വിസിറ്റേഴ്സ് റൂം എന്നിവയും കെട്ടിടത്തിലുണ്ട്. ഡോർമെറ്ററി കെട്ടിടത്തിൽ ഓരോ നിലയിലും നാല് കിടപ്പുമുറികളും അതോടനുബന്ധിച്ച് ശുചിമുറികളും നിർമ്മിച്ചിട്ടുണ്ട്. കൂടാതെ അടുക്കള, വരാന്ത തുടങ്ങിയവയും പൊതുവായി രണ്ട് ശുചിമുറികളും ഉണ്ട്. നിലവിൽ തണ്ണിത്തോട് മൂഴിയിലാണ് ഫോറസ്റ്റ് സ്റ്റേഷൻ കെട്ടിടം പ്രവർത്തിച്ചു വരുന്നത്.
