ഇരിട്ടി : കൊട്ടിയൂര് വൈശാഖ മഹോത്സവത്തിലെ നാല് ചതുശ്ശതങ്ങളില് ആദ്യത്തേതായ തിരുവാതിര ചതുശ്ശതം ഇന്ന് നടക്കും.ഭഗവാന് സമര്പ്പിക്കുന്ന വലിയവട്ടളം പായസ നിവേദ്യമാണ് ചതുശ്ശതം എന്നറിയപ്പെടുന്നത്. തിരുവാതിര പന്തീരടിയോടെയാണ് തിടപ്പള്ളിയില് പായസ നിവേദനം ആരംഭിക്കുക.നൂറ് ഇടങ്ങഴി അരി, നൂറു നാളികേരം, നൂറു കിലോ ശര്ക്കരയും നെയ്യും ചേര്ത്താണ് പായസം തയ്യാറാക്കുന്നത്. പായസം ഭഗവാന് നിവേദിച്ചശേഷം മണിത്തറയിലും കോവിലകം കയ്യാലയിലും പായസ നിവേദ്യം വിതരണം ചെയ്യും. വൈശാഖ മഹോത്സവത്തിലെ തൃക്കൂര് അരിയളവും ഇന്ന് നടക്കും.
കോട്ടയം സ്വരൂപത്തിലെ സ്ത്രീകള്ക്ക് പന്തീരടി കാമ്ബ്രം നമ്ബൂതിരിപ്പാട് നിശ്ചിത അളവ് അരി സ്വര്ണത്തളികയില് പകര്ന്ന് നല്കുന്ന ചടങ്ങാണ് ഇത്. രാത്രി പൂജയ്ക്കുശേഷം നാലു തറവാട്ടിലെ സ്ത്രീകള്ക്ക് മണിത്തറയില് അരിയും ഏഴില്ലക്കാര്ക്ക് പഴവും ശര്ക്കരയും നല്കും. തൃക്കൂര് അരിയളവിന് മാത്രമേ തറവാട്ടുകാരായ സ്ത്രീകള്ക്ക് അക്കരെ ക്ഷേത്രത്തില് പ്രവേശനം ഉണ്ടാകാറുള്ളൂ. രണ്ടാമത്തെ ചതുശ്ശതനിവേദ്യമായ പുണര്തം ചതുശ്ശതം നാളെയും ആയില്യം ചതുശ്ശതം 5 ന് ഞായറാഴ്ചയും നടക്കും. ആറിന് മകം കാലംവരവ് നടക്കുന്നതോടെ സ്ത്രീകള്ക്ക് അക്കരെ കൊട്ടിയൂരില് പ്രവേശനമുണ്ടായിരിക്കില്ല. നാലാമത്തെ ചതുശ്ശത നിവേദ്യമായി അത്തം ചതുശ്ശതം ഒന്പതിന് നടക്കും. അന്നുതന്നെയാണ് വാളാട്ടവും കലശപൂജയും നടക്കുക. 10 ന് തൃക്കലശാട്ടോടെ 28 നാള് നീണ്ടുനില്ക്കുന്ന ഉത്സവത്തിന് സമാപനമാകും.
