കോഴിക്കോട് : കൊയിലാണ്ടിയില് പ്രണയിച്ച് വിവാഹം കഴിച്ചവര്ക്കെതിരെ ഗൂണ്ടാ ആക്രമണം നടത്തിയ പ്രതി പിടിയില്. വധുവിന്റെ അമ്മാവനാണ് പിടിയിലായത്. കൊയിലാണ്ടി നടേരിയിലെ വി.സി കബീറിനെയാണ് പോലീസ് അറസ്റ്റ് ചെയ്തത്. കൊയിലാണ്ടി സിഐ കെ സി സുബാഷ് ബാബുവിന്റെ നേതൃത്വത്തിലാണ് അന്വേഷണം.
നാല് ദിവസം മുന്പാണ് നാടിനെ നടുക്കുന്ന ഗൂണ്ടാ ആക്രമണത്തിന് കൊയിലാണ്ടി സാക്ഷ്യം വഹിച്ചത്. മുഹമ്മദ് സ്വാലിഹ് എന്ന യുവാവ് പ്രണയിച്ച പെണ്കുട്ടിയെ വിവാഹം കഴിച്ചതാണ് പെണ്കുട്ടിയുടെ അമ്മാവനെ പ്രകോപിതനാക്കിയത്. പെണ്കുട്ടിയുടെ വീട്ടില് നിന്നുണ്ടായ കടുത്ത എതിര്പ്പിനെ മറികടന്നായിരുന്നു വിവാഹം. പെണ്കുട്ടിയുടെ ബന്ധുക്കളായ കബീര്, മന്സൂര് എന്നിവരടക്കമുള്ള എട്ടംഗ സംഘമാണ് സ്വാലിഹിനെയും ഭാര്യയെയും വാഹനത്തിലുണ്ടായിരുന്ന സുഹൃത്തുക്കളേയും ആക്രമിച്ചത്.
വിവാഹത്തിനായി കാറില് വരികയായിരുന്ന വധുവിനെയും വരനേയും വഴിയില് തടഞ്ഞ് നിര്ത്തിയാണ് എട്ടംഗ ഗൂണ്ടാ സംഘം ആക്രമണം അഴിച്ചുവിട്ടത്. വടിവാള് അടക്കമുള്ള മാരകായുധങ്ങള് ഉപയോഗിച്ച് വരനെയും വരന്റെ സുഹൃത്തുക്കളെയും വെട്ടി പരുക്കേല്പ്പിച്ചു. ഇതിന് പിന്നാലെ ബന്ധുക്കള്ക്കെതിരെ യുവതി രംഗത്തെത്തി. സ്വന്തം കുടുംബത്തില് വാപ്പയും ഉമ്മയും അടക്കം എല്ലാവര്ക്കും വിവാഹത്തിന് സമ്മതമാണെന്ന് വധു ഫര്ഹാന പറഞ്ഞു.
