കോഴിക്കോട്: മെഡിക്കല് കോളേജില് യുവതി ലൈംഗികാതിക്രമത്തിന് ഇരയായ സംഭവത്തില് പ്രതിയായ ശശീന്ദ്രനെ സര്വീസില് നിന്ന് പിരിച്ചുവിട്ടു. ഇയാളെ കൂടാതെ അഞ്ച് പേരെ സസ്പെന്ഡ് ചെയ്യുകയും ചെയ്തിട്ടുണ്ട്. പീഡനത്തിന് ഇരയായ യുവതിയെ സ്വാധീനിക്കാന് ശ്രമിച്ചതിനാണ് അഞ്ച് പേര്ക്കെതിരെ സസ്പെന്ഷന് ചെയ്തത്. മെഡിക്കല് വിദ്യാഭ്യാസ വകുപ്പ് ഡയറക്ടറുടെ അന്വേഷണത്തിന്റെ അടിസ്ഥാനത്തില് ആരോഗ്യ വകുപ്പ് മന്ത്രിയുടെ നിര്ദ്ദേശ പ്രകാരമാണ് നടപടി.
നേരത്തെ കേസില് അതിജീവിതയുടെ മൊഴി തിരുത്താന് സമ്മര്ദ്ദം ചെലുത്തിയ അഞ്ച് പേര്ക്കെതിരെ പോലീസ് കേസ് എടുത്തിരുന്നു. ജാമ്യമില്ലാ വകുപ്പുകള് പ്രകാരമാണ് കേസ് രജിസ്റ്റര് ചെയ്തിരിക്കുന്നത്. ഒരു നഴ്സിംഗ് അസിസ്റ്റന്റ്, ഒരു ഗ്രേഡ് 2 അറ്റന്ഡര്, മൂന്ന് ഗ്രേഡ് 1 അറ്റന്ഡര്മാര്ക്കും എതിരെയാണ് കേസ്. സാക്ഷിയെ സ്വാധീനിക്കല് , ഭീഷണിപ്പെടുത്തല് എന്നീ വകുപ്പുകള് ചുമത്തിയാണ് കേസ്സെടുത്തിരിക്കുന്നത്. തൈറോയ്ഡ് ശസ്ത്രക്രിയക്കു ശേഷം ഐസിയുവിലേക്ക് മാറ്റിയപ്പോഴാണ് യുവതിയെ ആശുപത്രിയിലെ അറ്റന്ഡര് ശശീന്ദ്രന് പീഡിപ്പിച്ചത്.
