തിരുവനന്തപുരം : കെ – റെയിലിനെതിരെ പ്രതിപക്ഷം ശക്തമായ പ്രതിഷേധം ഉയര്ത്തുന്നതിനിടെ പദ്ധതിയെക്കുറിച്ചുള്ള വിശദീകരണവുമായി കെആര്ഡിസി. ഇ.ശ്രീധരന് അടക്കമുള്ളവര് പദ്ധതി കേരളത്തെ രണ്ടായി വിഭജിക്കുമെന്ന് അഭിപ്രായപ്പെട്ടിരുന്നു. എന്നാല് കേരളത്തെ രണ്ടായി മുറിക്കുന്ന മതിലുകള് നിര്മ്മിക്കാനുദ്ദേശിക്കുന്നില്ലെന്ന് കേരള റെയില് ഡവലപ്മെന്റ് കോര്പ്പറേഷന് മാനേജിങ് ഡയരക്ടര് വി. അജിത് കുമാര് വ്യക്തമാക്കി. റെയില്വേ നിയമ പ്രകാരമുള്ള സംരക്ഷണ വേലി മാത്രമാണ് കെട്ടുന്നത്. ഓരോ അഞ്ഞൂറു മീറ്ററിലും റോഡ് മുറിച്ചു കടക്കാനുള്ള സംവിധാനങ്ങളുമുണ്ടാകും. ലോകമെങ്ങുമുള്ള 90 ശതമാനത്തിലധികം വേഗ റെയില്പ്പാതകളും തറ നിരപ്പിലാണ്.
അഞ്ചു വര്ഷംകൊണ്ട് പൂര്ത്തിയാക്കുന്നതിന് ഫാസ്റ്റ് ട്രാക്ക് അടിസ്ഥാനത്തിലാണ് സില്വര്ലൈന് പദ്ധതി ആസുത്രണം ചെയ്തിരിക്കുന്നതെന്ന് വി. അജിത് കുമാര് വ്യക്തമാക്കി. പദ്ധതി പൂര്ത്തിയാക്കാനുള്ള മൊത്തം ചെലവ് പ്രതീക്ഷിക്കുന്നത് 63, 941 കോടി രൂപയാണ്. 2025 വരെയുള്ള ചെലവു വര്ധനവും നികുതികളും നിര്മ്മാണ ഘട്ടത്തിലെ പലിശയും ഉള്പ്പെടെയാണ് ഈ തുക കണക്കാക്കിയിട്ടുള്ളത്.
ഒരു റെയില്വേ ലൈന് പണിയുന്നതിനു അഞ്ചു കൊല്ലം ധാരാളമാണ്. രണ്ടു കൊല്ലത്തിനകം ഭൂമി ഏറ്റെടുക്കല് നടപടികള് പൂര്ത്തിയാക്കിയാല് അഞ്ചു വര്ഷം കൊണ്ടു പണി പൂര്ത്തിയാക്കും. എട്ടു, പത്തുകൊല്ലം കൊണ്ട് പൂര്ത്തിയാക്കുന്ന പദ്ധതിയുടെ ചെലവ് വല്ലാതെ ഉയരും. അഞ്ചു കൊല്ലം പൂര്ത്തിയാക്കിയാല് ആ പദ്ധതി പ്രായോഗികമായിരിക്കും. ഏത് പദ്ധതിയും എത്ര പെട്ടെന്ന് പൂര്ത്തിയാക്കുന്നുവോ അത്രയും ലാഭകരമായിരിക്കുമെന്നും അദ്ദേഹം പറഞ്ഞു.
