തൃശൂര് : കോര്പ്പറേഷന് പുല്ലഴി ഡിവിഷന് തെരഞ്ഞെടുപ്പുമായി ബന്ധപ്പെട്ട് യു.ഡി.എഫിന്റെ തെരഞ്ഞെടുപ്പ് പൊതുയോഗത്തില് ശ്രോതാവായെത്തിയ ജീവനക്കാരിയെ കെ.എസ്.എഫ്.ഇയില്നിന്ന് പിരിച്ചുവിട്ടതായി പരാതി. മൂന്ന് വര്ഷമായി കെ.എസ്.എഫ്.ഇയിലെ ജൂനിയര് അസി. തസ്തികയില് ജോലി ചെയ്യുന്ന ജിന്സി ജോസിനെയാണ് ജോലിയില്നിന്ന് പിരിച്ചുവിട്ടത്.
പുല്ലഴി ഡിവിഷനിലെ വോട്ടറാണ് ജിന്സി. കഴിഞ്ഞ ദിവസം നടന്ന യു.ഡി.എഫിന്റെ തെരഞ്ഞെടുപ്പ് പ്രചാരണ യോഗത്തില് കേള്വിക്കാരിയായി ജിന്സി ജോസ് പങ്കെടുത്തിരുന്നു. ഇതാണ് നടപടിക്ക് കാരണമെന്ന് പറയുന്നു. തെരഞ്ഞെടുപ്പ് യോഗത്തില് കേള്വിക്കാരിയായി പങ്കെടുത്തതിന് ജീവനക്കാരിയെ പിരിച്ചുവിട്ട നടപടി ജനാധിപത്യ വിരുദ്ധവും സാമൂഹിക നീതിക്ക് നിരക്കാത്തതുമാണെന്ന് ഡി.സി.സി പ്രസിഡന്റ് എം.പി. വിന്സെന്റ് പറഞ്ഞു.
നടപടിക്കെതിരെ കെ.എസ്.എഫ്.ഇ ഓഫിസിന് മുന്നില് കോണ്ഗ്രസിന്റെ പ്രതിഷേധം നടത്തുമെന്നും വിന്സെന്റ് അറിയിച്ചു. ഡി.വൈ.എഫ്.ഐ ജില്ല വൈസ് പ്രസിഡന്റ് അടക്കമുള്ളവര് കെ.എസ്.എഫ്.ഇയുടെ താല്ക്കാലിക ജീവനക്കാരാണ്. തെരഞ്ഞെടുപ്പില് മത്സരിച്ച് തോറ്റവരും കെ.എസ്.എഫ്.ഇയിലുണ്ട്. കേള്വിക്കാരിയായി യോഗത്തിനെത്തിയതിന് വീട്ടമ്മയെ ജോലിയില്നിന്ന് പിരിച്ചുവിട്ടത് ക്രൂരതയും രാഷ്ട്രീയ ഫാഷിസത്തിന് തെളിവുമാണെന്ന് ടി.എന്. പ്രതാപന് എം.പി ആരോപിച്ചു. വിഷയം ചെയര്മാന്റെ ശ്രദ്ധയില് ഉന്നയിച്ചെങ്കിലും രാഷ്ട്രീയ സമ്മര്ദത്തെ തുടര്ന്ന് അവഗണിക്കുകയായിരുന്നെന്ന് പ്രതാപന് പറഞ്ഞു.
