മൂന്നാര് : തമിഴ്നാട്ടില് നിന്ന് മൂന്നാറിലേക്ക് വരുകയായിരുന്ന കെഎസ്ആര്ടിസി ബസിന്റെ ചില്ല് ഒറ്റയാന് തകര്ത്തു. തേനിയില് നിന്നും പുറപ്പെട്ട ബസ് തോണ്ടി മലയില് എത്തിയപ്പോഴായിരുന്നു കാട്ടാനയുടെ ആക്രമണം. ശനിയാഴ്ച്ച പുലര്ച്ചെ ഒരു മണിക്ക് തേനിയില് നിന്നും പുറപ്പെട്ട ബസ് രണ്ടേകാലിന് തോണ്ടിമലയില് എത്തിയപ്പോഴായിരുന്നു സംഭവം. കാട്ടില് നിന്നും റോഡിലേക്ക് കയറിയ ആന ബസ് കടത്തിവിടാതെ കുറുകെ നിന്നു. സാധാരണ ആനകള് വഴിയില് ഉണ്ടാകാറുണ്ടെങ്കിലും ബസുകളെ ആക്രമിക്കാറില്ല. എന്നാല് ബസിന് മുന്നില് എത്തിയ ആന പെട്ടെന്ന് പ്രകോപിതനായതോടെ ബസ് ജീവനക്കാരും അമ്പതോളം യാത്രക്കാരും ഭയന്നു.
ബസിന്റെ മുന്നിലെ ഗ്രില്ലില് ആന കൊമ്പ് കൊണ്ട് തട്ടിയതോടെ യാത്രക്കാര് ഉച്ചത്തില് നിലവിളിച്ചു. ഇതോടെ ആന കൂടുതല് അക്രമകാരിയായി. തലയുയര്ത്തി ഇടത് വശത്തെ ചില്ല് കൊമ്പ് കൊണ്ട് കുത്തിതകര്ത്തു. അരമണിക്കൂറോളം അവിടെ തന്നെ നിലയുറപ്പിച്ച ആന സ്വയം പിന്തിരിഞ്ഞതോടെയാണ് യാത്ര തുടര്ന്നത്. ഡ്രൈവര് സതീഷ് കുമാറിന്റേയും കണ്ടക്ടര് ദേവേന്ദ്രന് ഗോപാലന്റേയും മനസ്സാന്നിധ്യമാണ് തുണയായതെന്ന് യാത്രക്കാര് പറഞ്ഞു. തന്റെ 23 വര്ഷത്തെ മൂന്നാറിലെ സര്വീസിനിടയില് ആദ്യമായാണ് ആന ബസിനെ ആക്രമിക്കുന്നതെന്ന് മൂന്നാര് ഡിപ്പോ ഇന് ചാര്ജ് സേവി ജോര്ജ് പറഞ്ഞു. എണ്ണായിരം രൂപയുടെ നഷ്ടം ഉണ്ടായതായും അദ്ദേഹം പറഞ്ഞു.