തിരുവനന്തപുരം: ഇന്ധന പ്രതിസന്ധിക്ക് താത്കാലിക പരിഹാരമായി സ്വകാര്യ പമ്ബുകളില് നിന്ന് ഡീസല് നിറച്ച് കെ.എസ്.ആര്.ടി.സി. അവധി ദിവസങ്ങളില് ബസുകള് കുറച്ചതും ഇന്നത്തെ സര്വീസിനു നേട്ടമായി. ഇന്നലെ 3600 ബസ് സര്വീസുകളാണ് കെ.എസ്.ആര്.ടി.സി ഓടിച്ചത്. ഏതാനും മാസങ്ങളായി 3600- 3850 സര്വീസുകളാണ് ഓടിക്കുന്നത്.
ദിവസ വരുമാനത്തില് നിന്ന് ഡീസലടിക്കാനുള്ള ക്രമീകരണം ഞായറാഴ്ച വൈകിട്ടാണ് തുടങ്ങിയത്. ഇതേത്തുടര്ന്ന് എല്ലാ ബസുകളിലും അവശ്യത്തിന് ഡീസല് ഉറപ്പാക്കി. വൈകീട്ടുള്ള ദീര്ഘദൂര ബസുകളെല്ലാം നിരത്തിലിറക്കിയതോടെ യാത്രാക്ലേശവും കുറഞ്ഞു. സര്ക്കാര് അനുവദിച്ച 20 കോടി രൂപ കോര്പ്പറേഷന് ലഭിച്ചിട്ടില്ല. ഒന്നോ രണ്ടോ ദിവസത്തിനുള്ളില് നടപടി പൂര്ത്തിയാക്കി പണം അക്കൗണ്ടിലെത്തുന്നതോടെ എണ്ണക്കമ്പനികള്ക്ക് കുടിശ്ശികയുള്ള 13 കോടിയും തീര്ക്കാനാകും.ജൂലായിലെ ശമ്പളം നല്കാനും ഇതുവരെ കഴിഞ്ഞിട്ടില്ല. സര്ക്കാരിനോട് 65 കോടി ആവശ്യപ്പെട്ടിട്ടുണ്ട്. 250 കോടിയുടെ രക്ഷാപാക്കേജ് സംബന്ധിച്ച മന്ത്രിതല ചര്ച്ചകള് അന്തിമഘട്ടത്തിലാണ്. ഇതിലാണ് മാനേജ്മെന്റിന്റെയും തൊഴിലാളികളുടെയും പ്രതീക്ഷ. കെ.എസ്.ആര്.ടി.സിയിലെ പ്രതിസന്ധി സംബന്ധിച്ച് മുഖ്യമന്ത്രി പിണറായി വിജയന് ഇന്നലെ മന്ത്രി ആന്റണി രാജുവുമായി ചര്ച്ച നടത്തിയിരുന്നു.