തിരുവനന്തപുരം : കെ.എസ്.ആര്.ടി.സി ബസുകളില് മൊബൈല് ഫോണിന്റെയും ഇലക്ട്രോണിക് ഉപകരണങ്ങളുടേയും ഉപയോഗം നിയന്ത്രിച്ചു. ഇത് സംബന്ധിച്ച് നിരവധി പരാതികള് ഉണ്ടാകുന്ന സാഹചര്യത്തിലാണ് നടപടി. കെ എസ് ആര് ടി സി മാനേജിങ് ഡയറക്ടര് പുറത്തിറക്കിയ പത്രക്കുറിപ്പിലാണ് ഇക്കാര്യം അറിയിച്ചത്. ഉച്ചത്തില് മൊബൈല് ഫോണ് ഉപയോഗിക്കുക, ഇലക്ട്രോണിക് ഉപകരണങ്ങള് ഉപയോഗിക്കുക, ശബ്ദ ചിത്രങ്ങള് വീക്ഷിക്കുക എന്നിവയാണ് നിരോധിച്ചത് . ചില യാത്രക്കാര് അമിത ശബ്ദത്തില് മൊബൈല് ഫോണില് സംസാരിക്കുന്നതും സഭ്യമല്ലാതെ സംസാരിക്കുന്നതും അമിത ശബ്ദത്തില് വീഡിയോ, ഗാനങ്ങള് എന്നിവ ശ്രവിക്കുന്നതും സഹയാത്രക്കാര്ക്ക് ബുദ്ധിമുണ്ടാകുന്നവെന്ന നിരവധി പരാതികളാണ് ഉണ്ടാകുന്നത്.
എല്ലാത്തരം യാത്രക്കാരുടേയും താല്പ്പര്യങ്ങള് പരമാവധി സംരക്ഷിച്ച് കൊണ്ട് സുരക്ഷിതമായ യാത്ര പ്രദാനം ചെയ്യാനാണ് കെ എസ് ആര് ടി സിയുടെ ശ്രമം. കൂടാതെ ഇത്തരത്തിലുള്ള പെരുമാറ്റം കാരണം ബസിനുള്ളില് യാത്രക്കാര് തമ്മില് അനാരോഗ്യവും അസുഖകരവുമായ യാത്രാ അന്തരീക്ഷം സൃഷ്ടിക്കുകയും ചെയ്യുന്നു. ഈ സാഹചര്യത്തിലാണ് കെ എസ് ആര് ടി സി ഇത്തരത്തിലുള്ള ഉപയോഗങ്ങള്ക്ക് നിരോധനം ഏര്പ്പെടുത്തിയത്. ഇത് ബസിനുള്ളില് എഴുതി പ്രദര്ശിപ്പിക്കും. കൂടാതെ ബസിനുള്ളില് ഇത് സംബന്ധിച്ചുണ്ടാകുന്ന പരാതികള് കണ്ടക്ടര്മാര് സംയമനത്തോടെ പരിഹരിക്കുകയും ഈ നിര്ദ്ദേശങ്ങള് പാലിക്കാന് യാത്രക്കാരോട് അഭ്യര്ത്ഥിക്കുകയും ചെയ്യും.
