പത്തനംതിട്ട: കെ.എസ്.ആര്.റ്റി.സി ബസുകളില് സ്ത്രീകള്ക്ക് സൗജന്യ യാത്ര അനുവദിച്ചതോടെ വലിയ തിരക്കാണ് ഇപ്പോള് പത്തനംതിട്ടയില് നിന്നും ഗവിയിലേക്കുള്ള കെ.എസ്.ആര്.റ്റി.സി ബസുകളില് അനുഭവപ്പെടുന്നത്. പുലര്ച്ചെ 5.30നും രാവിലെ 6.30നും രണ്ട് സര്വീസുകള് ആണ് പത്തനംതിട്ടയില് നിന്നും ഗവിയിലേക്ക് സര്വീസ് നടത്തുന്നത്. ഗവിയിലേക്കുള്ള ഓര്ഡിനറി ബസുകളില് കയറ്റുവാന് കഴിയാവുന്നതിലും അധികം ആളുകള് കയറി യാത്ര ചെയ്യാന് തുടങ്ങിയത് വലിയ അപകട ഭീഷണിയാണ് ഉയര്ത്തുന്നത്.
യാത്രക്കാരെ യാതൊരു സുരക്ഷയുമില്ലാതെ ബസുകളില് കുത്തി നിറച്ച് കൊണ്ടുപോകാന് തുടങ്ങിയതോടെ ഗവി ബസില് സ്ഥിരമായി യാത്ര ചെയ്തിരുന്ന ചിറ്റാര്, സീതത്തോട്, ആങ്ങമൂഴി, ഉന്നതി നിവാസികള്ക്ക് ബസില് യാത്ര ചെയ്യാന് കഴിയാത്ത അവസ്ഥയാണെന്ന് ഇവര് പറയുന്നു. യാത്രക്കാരുടെ തിരക്ക് മൂന്ന് മടങ്ങായി വര്ധിച്ചുവെങ്കിലും കൂടുതലും സ്ത്രീകളുടെ സൗജന്യ യാത്രയായതിനാല് കെ.എസ്.ആര്.റ്റി.സി യ്ക്ക് ലഭിച്ചുകൊണ്ടിരുന്ന വരുമാനവും കുറഞ്ഞു. പുലര്ച്ചെ പത്തനംതിട്ട കെ.എസ്.ആര്.റ്റി.സി ഡിപ്പോയില് നിന്നും പുറപ്പെടുന്ന ബസായതിനാല് രാത്രിയില് എത്തുന്ന ആളുകള് ബസിനുള്ളില് കിടന്നുറങ്ങിയതിന് ശേഷം ഇതേ ബസില് ഗവിക്ക് പോകുന്ന പ്രവണതയും വര്ദ്ധിച്ചിട്ടുണ്ട്.
60 സീറ്റുള്ള ബസിലാണ് നൂറിലധികം ആളുകളെ കയറ്റി യാത്ര ചെയ്യുന്നത്. ഗവി, ഉന്നതി തുടങ്ങിയ സ്ഥലങ്ങളില് കെ.എസ്.ഇ.ബിയിലും വനം വകുപ്പിലും ജോലി ചെയുന്ന നിരവധി പേരുണ്ട്. ഇവരില് പലര്ക്കും പത്തനംതിട്ടയില് നിന്നും നിന്നും ഗവിയിലേക്ക് പോകുവാന് ഈ ബസ് തന്നെയാണ് ഏക ആശ്രയം. ഈ ബസില് ഇരുപത്തിയയ്യായിരം രൂപയില് അധികം ടിക്കറ്റ് ഒരു ദിവസം ചിലവാകുന്നുണ്ട്. എങ്കിലും കൂടുതലും സൗജന്യ യാത്രയായതിനാല് മൂവായിരം രൂപയില് താഴെ മാത്രമാണ് വരുമാനം ലഭിക്കുന്നത്. ഇത്രയും ആളുകളെ കുത്തി നിറച്ച് കൊണ്ടു പോകുമ്പോള് ബസുകളുടെ കാര്യക്ഷമത കൂടി പരിശോധനക്ക് വിധേയമാക്കേണ്ടതുണ്ട്. ഗവിയിലെക്ക് കൂടുതല് ബസുകള് അനുവദിക്കണമെന്നും ആവശ്യമുയരുന്നു.
