തിരുവനന്തപുരം: ചിറയിൻകീഴിൽ കെഎസ്ആർടിസി സർവീസ് ഉദ്ഘാടനം ഡിസിസി ജനറൽ സെക്രട്ടറി നടത്തിയ സംഭവത്തിൽ കെഎസ്ആർടിസി സിഎംഡിക്ക് പരാതി നൽകി സിപിഐ. കിഴുവിലം ഗ്രാമപഞ്ചായത്ത് അംഗം എ അൻവർ ഷായാണ് പരാതി നൽകിയത്. എസ് കൃഷ്ണകുമാർ സർവീസ് ഉദ്ഘാടനം ചെയ്തത് ഗുരുതരമായ പ്രോട്ടോക്കോൾ ലംഘനമാണെന്ന് അദ്ദേഹം ചൂണ്ടിക്കാണിച്ചു. മന്ത്രി ബിന്ദു കൃഷ്ണയുടെ ഭർത്താവെന്ന സ്വാധീനത്തിലാണ് ഉദ്ഘാടനം നിർവഹിച്ചതെന്ന് പരാതിയിൽ ചൂണ്ടിക്കാണിച്ചു.
സർക്കാരിന്റെ ഏതെങ്കിലും ഔദ്യോഗിക പദവി വഹിക്കുന്നുണ്ടോ എന്ന് വ്യക്തമാക്കണം. ചട്ടവിരുദ്ധ നടപടി സ്വീകരിച്ച ഉദ്യോഗസ്ഥർക്കെതിരെ നടപടി സ്വീകരിക്കണമെന്നും പരാതിയിൽ ആവശ്യപ്പെട്ടു. തിങ്കളാഴ്ചയാണ് ചിറയൻകീഴിൽ നിന്നും കൊല്ലത്തേക്ക് ആരംഭിച്ച കെഎസ്ആർടിസി സർവീസ് ഉദ്ഘാടനം എസ് കൃഷ്ണകുമാർ നിർവഹിച്ചത്. ഉദ്ഘാടകയായ രമ്യ ഹരിദാസ് എംഎൽഎയുടെ ഓഫീസ് നിർദേശിച്ച പ്രകാരമാണ് നടപടി എന്നായിരുന്നു കെഎസ്ആർടിസി അധികൃതരുടെ മറുപടി. ഉദ്ഘാടന ചിത്രം കൃഷ്ണകുമാർ തൻറെ ഫേസ്ബുക്ക് പേജിൽ ഷെയർ ചെയ്തിരുന്നു.
