ആറന്മുള : ആറന്മുള ഉത്രട്ടാതി ജലമേള കാണുന്നതിനായി എത്തിച്ചേരുന്ന വാഹനങ്ങൾ പോലീസ് നിർദ്ദേശിച്ചിട്ടുള്ള പാർക്കിംഗ് ഗ്രൗണ്ടുകളിൽ പാർക്ക് ചെയ്ത ശേഷം ഡ്രൈവർമാർക്ക് ക്ഷേത്ര പരിസരത്തേക്കും സത്രക്കടവ് ഭാഗത്തേക്കും പോകുന്നതിനായി നാല് കെ.എസ്.ആർ.റ്റി.സി ബസുകൾ സർവീസ് നടത്തും. ജില്ലാ പോലീസ് മേധാവിയുടെ അഭ്യർത്ഥന പ്രകാരം ജില്ലാ കളക്ടറുടെ ഇടപെടലിലാണ് ഈ സംവിധാനം ഒരുക്കിയത്. കോഴഞ്ചേരി, റാന്നി ഭാഗങ്ങളിൽ ഉള്ള പാർക്കിംഗ് ഗ്രൗണ്ടുകളിൽ പാർക്ക് ചെയ്യുന്ന വാഹനങ്ങളുടെ ഡ്രൈവർമാർക്ക് കോഴഞ്ചേരി കെ.എസ്.ആർ.റ്റി.സി ബസ്റ്റാൻഡ് ഭാഗത്തുനിന്നും ഈ സൗകര്യം പ്രയോജനപ്പെടുത്താവുന്നതാണ്.
ചെങ്ങന്നൂർ, മാലക്കര, കോഴിപ്പാലം ഭാഗങ്ങളിലുള്ള പാർക്കിംഗ് ഗ്രൗണ്ടുകളിൽ നിന്നും വരുന്ന ഡ്രൈവർമാർക്ക് മാലക്കര ഭാഗത്ത് ബസ് സൗകര്യം ലഭിക്കുന്നതാണ്. പന്തളം, കുളനട, കിടങ്ങന്നൂർ, നാൽക്കാരിക്കൽ ഭാഗങ്ങളിൽ നിന്ന് വരുന്ന വാഹനങ്ങളുടെ ഡ്രൈവർമാർക്ക് കിടങ്ങന്നൂർ മുതൽ ബസ് സൗകര്യം ലഭിക്കുന്നതാണ്. പത്തനംതിട്ട, ഇലന്തൂർ, തെക്കേമല ഭാഗങ്ങളിൽ നിന്ന് വരുന്ന വാഹനങ്ങളുടെ ഡ്രൈവർമാർക്ക് തെക്കേമലയിൽ നിന്നും വാഹന സൗകര്യം ലഭിക്കുന്നതാണ്. ഉപരാഷ്ട്രപതിയുടെ വാഹന വ്യൂഹം കടന്നുപോകുന്നതിന് തടസ്സം വരാത്ത രീതിയിൽ പരമാവധി ഡ്രൈവർമാർക്ക് പ്രയോജനം ലഭിക്കത്തക്ക തരത്തിലാണ് ഈ സംവിധാനം ഒരുക്കിയിട്ടുള്ളതെന്ന് ജില്ലാ പോലീസ് മേധാവി അറിയിച്ചു.
