തിരുവനന്തപുരം : മന്ത്രിസ്ഥാനത്തുനിന്ന് നീക്കണമെന്ന ലോകായുക്ത റിപ്പോര്ട്ടിനെതിരെ ഉന്നത വിദ്യാഭ്യാസ മന്ത്രി കെ.ടി. ജലീല് ഇന്ന് ഹൈക്കോടതിയെ സമീപിക്കും. ബന്ധുനിയമന വിവാദവുമായി ബന്ധപ്പെട്ടാണ് ലോകായുക്ത മന്ത്രിക്കെതിരെ റിപ്പോര്ട്ട് നല്കിയിരിക്കുന്നത്.
അവധിക്കാല ബെഞ്ചിന് മുന്നില് ഹര്ജി എത്തിക്കുന്നതിനുള്ള ശ്രമമാണ് നടത്തുന്നത്. അടിയന്തിര പ്രധാന്യത്തോടെ ഹര്ജി പരിഗണിക്കണമെന്ന് ആവശ്യപ്പെട്ടേക്കും. ഇതിനായി നിയമ വിദഗ്ദ്ധരുമായി ജലീല് കൂടിയാലോചന നടത്തി. സത്യപ്രതിജ്ഞാ ലംഘനം, അധികാര ദുര്വിനിയോഗം, സ്വജനപക്ഷപാതം എന്നിങ്ങനെ ഗുരുതരമായ കണ്ടെത്തലാണ് ലോകായുക്തയുടെ ഭാഗത്തുനിന്ന് ഉണ്ടായിരിക്കുന്നത്. മന്ത്രിയെന്ന നിലയില് സത്യസന്ധതയില്ലാത്ത നടപടിയാണ് ഉണ്ടായതെന്നും റിപ്പോര്ട്ടില് പറയുന്നു.
അതേസമയം ഇന്ന് പ്രത്യേക ദൂതന് വഴി ലോകായുക്ത ഉത്തരവ് മുഖ്യമന്ത്രി പിണറായി വിജയന്റെ ഓഫിസിലെത്തിച്ചേക്കും. ബന്ധുനിയമന വിവാദത്തില് മന്ത്രി കെ.ടി.ജലീലിനെതിരായ ഉത്തരവാണ് മുഖ്യമന്ത്രിയുടെ ഓഫീസില് എത്തിക്കുന്നത്. മൂന്നു മാസത്തിനുള്ളിലാണ് മുഖ്യമന്ത്രി ലോകായുക്തയുടെ റിപ്പോര്ട്ടില് തീരുമാനം എടുക്കേണ്ടത്. ജലീല് രാജിവെയ്ക്കേണ്ടതില്ലെന്ന നിലപാടിലാണു സിപിഎം നേതൃത്വം. സ്വജനപക്ഷപാതിത്വവും സത്യപ്രതിജ്ഞാ ലംഘനവും മന്ത്രി കാണിച്ചെന്നും അതിനാല് മന്ത്രി സ്ഥാനത്ത് നിന്ന് ജലീലിനെ നീക്കണമെന്നും ലോകായുക്ത മുഖ്യമന്ത്രിയോട് ആവശ്യപ്പെട്ടിട്ടുണ്ട്.
വിവാദത്തിനിടയാക്കിയത് ബന്ധുവായ കെ.ടി. അദീപിനെ നിയമിച്ചതാണ് . ന്യൂനപക്ഷ വികസന ധനകാര്യ കോര്പ്പറേഷനില് ജനറല് മാനേജരായിട്ടാണ് മന്ത്രി ബന്ധുവിനെ നിയമിച്ചത്. യോഗ്യതയില് ഇളവ് വരുത്തി വിജ്ഞാപനം ഇറക്കിയാണ് മന്ത്രി ബന്ധുവിന് ജോലി നേടിക്കൊടുത്തത്.
