തലയോലപ്പറമ്പ് : കുലശേഖരമംഗലത്ത് സിപിഐ എം ലോക്കല് കമ്മിറ്റി ഓഫീസ് അക്രമിച്ച് തകര്ത്തു. വ്യാഴാഴ്ച്ച വൈകിട്ട് എഴു മണിയോടെയാണ് സംഭവം. നിരവധി ക്രിമിനല് കേസുകളിലെ പ്രതി മീനാക്ഷി ഭവനത്തില് സുരേഷ് രാജ് (30) ലോക്കല് കമ്മിറ്റി യോഗം ചേരുന്ന സമയം ഓഫീസിനുള്ളില് കയറി കമ്മിറ്റി തടസപ്പെടുത്തുകയും അസഭ്യം പറയുകയുമായിരുന്നു. ഇത് ചോദ്യം ചെയ്ത ലോക്കല് കമ്മിറ്റി അംഗം കണ്ണന് സോമനെയും കയ്യേറ്റം ചെയ്തു.
പുറത്തിറങ്ങി ഓഫീസിനു മുന്വശത്തിരുന്ന വാഹനങ്ങള് ചവിട്ടി മറിക്കുകയും കമ്പി വടികൊണ്ട് ഓഫീസിന്റെ ചില്ലുകള് അടിച്ചു തകര്ക്കുകയുമായിരുന്നു. തലയ്ക്ക് പരിക്കേറ്റ കണ്ണന് സോമനെ വൈക്കം താലൂക്ക് ആശുപത്രിയില് ചികിത്സയില് പ്രവേശിപ്പിച്ചു. സുരേഷ് രാജിനെതിരെ വൈക്കം പോലീസ് കേസെടുത്തു. ഇത്തരക്കാര്ക്കെതിരെ ശക്തമായ നിയമ നടപടി വേണമെന്ന് സിപിഐ എം തലയോലപ്പറമ്പ് ഏരിയാ സെക്രട്ടറി കെ.ശെല്വരാജ് ആവശ്യപ്പെട്ടു.
