കൊടുങ്ങല്ലൂര് : റിന്സിയുടെ കൊലപാതകം പ്രതി വെട്ടാന് ഉപയോഗിച്ച വാള് കണ്ടെത്തി. സംഭവ സ്ഥലത്തുനിന്ന് പ്രതിയുടെ വീട്ടിലേക്ക് പോകുന്ന വഴിയില്നിന്നാണ് ആയുധം ലഭിച്ചത്. നാട്ടുകാര് കണ്ടെത്തി പോലീസിനെ വിവരം അറിയിക്കുകയായിരുന്നു. യുവാവിന്റെ ആക്രമണത്തില് മരിച്ച റിന്സിയുടെ ദേഹത്ത് മുപ്പതോളം വെട്ടുകളാണ് ഏറ്റത്. വെട്ടേറ്റ് ഇവരുടെ കൈവിരലുകള് അറ്റു. വിരലുകള് കവറിലാക്കിയാണ് ആശുപത്രിയില് എത്തിച്ചത്. വ്യാഴാഴ്ച രാത്രി മക്കളോടൊപ്പം സ്കൂട്ടറില് യാത്ര ചെയ്യവെയാണ് റിന്സിയെ പ്രതി റിയാസ് വെട്ടിപ്പരിക്കേല്പ്പിച്ചത്. വെള്ളിയാഴ്ച രാവിലെ ഇവര് മരണത്തിന് കീഴടങ്ങി. എറിയാട് ബ്ലോക്ക് ഓഫിസിന് തെക്ക് മാങ്ങാറ പറമ്പില് നാസറിന്റെ ഭാര്യ റിന്സി (30) ആണ് ആക്രമണത്തിനിരയായത്.
കൈക്കും തലക്കും ഗുരുതര പരിക്കേറ്റ റിന്സിയെ ആദ്യം കൊടുങ്ങല്ലൂര് ചന്തപ്പുര എ.ആര് മെഡിക്കല് സെന്ററില് പ്രവേശിപ്പിച്ചെങ്കിലും പിന്നീട് തൃശൂര് എലൈറ്റ് ആശുപത്രിയിലേക്ക് മാറ്റുകയായിരുന്നു. എറിയാട് കേരള വര്മ സ്കൂളിന് സമീപം ഭര്ത്താവിനൊപ്പം വസ്ത്രാലയം നടത്തുന്ന റിന്സി കടയില്നിന്ന് മക്കളോടൊപ്പം വീട്ടിലേക്ക് മടങ്ങുമ്പോഴായിരുന്നു ആക്രമണം. ആളൊഴിഞ്ഞ സ്ഥലത്ത് മറഞ്ഞുനിന്ന അക്രമി പൊടുന്നനെ ആക്രമണം നടത്തുകയായിരുന്നു. ആക്രമണം കണ്ട് മക്കള് ഭയന്നു കരഞ്ഞു. ഇതുകേട്ട് വന്ന ബൈക്ക് യാത്രികര് ബഹളം വെച്ചതിനെ തുടര്ന്ന് അക്രമി സ്ഥലം വിടുകയായിരുന്നു.
പ്രദേശവാസിയായ പുതിയ വീട്ടില് റിയാസ് (26) ആണ് ഇവരെ വെട്ടിയത്. ഇയാള് റിന്സിയുടെ കടയിലെ മുന് ജീവനക്കാരനാണ്. റിയാസിനെതിരെ യുവതി നേരത്തേ പരാതി നല്കിയിരുന്നു. ഇതിലുള്ള പ്രതികാരമാണ് ആക്രമണത്തിന് പിന്നിലെന്ന് പറയുന്നു. ഇയാള്ക്കായി രാത്രി തന്നെ തിരച്ചില് ആരംഭിച്ചിരുന്നു. മൊബൈല് ഫോണ് വീട്ടില് ഉപേക്ഷിച്ചാണ് ഇയാള് രക്ഷപ്പെട്ടിട്ടുള്ളത്. പ്രതിക്കായി പോലീസ് അന്വേഷണം ഊര്ജിതമാക്കിയിട്ടുണ്ട്.
