മലപ്പുറം: അരീക്കോട് കുനിയില് ഇരട്ടക്കൊലക്കേസില് പ്രതികളായ പന്ത്രണ്ട് പ്രതികള്ക്ക് ഇരട്ട ജീവപര്യന്തം ശിക്ഷ വിധിച്ച് കോടതി. അമ്പതിനായിരം രൂപ വീതം പിഴയും ഒടുക്കണം. കേസില് ഒന്നു മുതല് 11 വരെയുള്ള പ്രതികളും 18 ആം പ്രതിയും കുറ്റക്കാരാണെന്ന് നേരത്തെ കോടതി കണ്ടെത്തിയിരുന്നു. മഞ്ചേരി മൂന്നാം അഡീഷനല് ജില്ല സെഷന്സ് കോടതിയാണ് വിധി പറഞ്ഞത്. കോളിളക്കമുണ്ടാക്കിയ കേസില് 21 പ്രതികളാണുണ്ടായിരുന്നത്. ഇതില് 12 പേരെയാണ് കോടതി കുറ്റക്കാരെന്ന് കണ്ടെത്തിയത്.
2012 ജൂണ് 10ന് കൊളക്കാടന് അബൂബക്കര്, സഹോദരന് അബ്ദുല് കലാം ആസാദ് എന്നിവരെ മുഖംമൂടി ധരിച്ചെത്തിയ സംഘം നടുറോഡില് വെട്ടിക്കൊലപ്പെടുത്തുകയായിരുന്നു. ആ വര്ഷം ജനുവരിയില് നടന്ന മറ്റൊരു കൊലപാതകത്തിന്റെ പ്രതികാരമായിരുന്നു ഇരട്ടക്കൊല. കുനിയില് കുറുവാടന് മുക്താര്, കോഴിശ്ശേരിക്കുന്നത് റാഷിദ്, റഷീദ്, ചോലയില് ഉമ്മര്, തുടങ്ങി 21 പേരായിരുന്നു കേസിലെ പ്രതികള്. സഹോദരങ്ങളായ കുനിയില് കൊളക്കാടന് അബൂബക്കര്, ആസാദ് എന്നിവരെ മുഖംമൂടി ധരിച്ചെത്തിയ സംഘം കുനിയില് അങ്ങാടിയില് വച്ചു വെട്ടിയും കുത്തിയും കൊലപ്പെടുത്തി എന്നാണ് കേസ്.
